Дөрвөн жилд нэг удаа болдог MEMORIAD World Mental Sports Olympics (Memory, Mental Calculation and Speed Reading) буюу Оюуны олимп АНЭУ-ын Дубай хотод өчигдөр (2024.11.07) эхэлжээ.
Дэлхийн 35 улсаас өсвөр, насанд хүрэгчдийн ангилалд 12 төрлөөр 180 тамирчин өрсөлдөж буй тус олимпын эхний тэмцээн болох "Хурдны хөзөр" төрөлд ой тогтоолтын хоёр удаагийн Дэлхийн аварга, Олон улсын их мастер Н.Мөнхшүр алтан медаль авч, Оюуны олимпын аварга болсон бахдам амжилтаар медалийн буухиаг эхлүүлсэн байна.
Насанд хүрэгчдийн буюу 13-аас дээш насны ангилалд тэргүүлсэн Н.Мөнхшүр 19.47 секундын амжилт үзүүлсэн бол Ц.Оюун-Эрдэнэ 20.62 секундын амжилтаар мөнгө, Ц.Номин-Эрдэнэ 22.05 секундын амжилтаар хүрэл медаль хүртжээ. Мөн бага буюу 13 хүртэлх насны ангилалд О.Ирмүүн 37.8 секундын амжилт үзүүлж, түрүүлсэн байна.
Оюуны олимпын хоёр дахь төрөл болох цээж бодолтын "Mental Multiplications" буюу 8 оронтой 2 тооны үржвэрийг олох төрөлд Х.Анирлан нийт 10 бодлогыг 6 минутад алдаагүй бодсоноор мөнгөн медаль хүртжээ.
Манай тамирчдын хувьд олон улсын 70 дахь тэмцээндээ оролцож байгаа нь энэ юм. Өнгөрсөн 15 жилийн хугацаанд баг тамирчид маань олон улсаас 140 цом, 1500 гаруй медаль хүртэж, Гиннес, Дэлхийн олон дээд амжилтыг эзэмшиж байгаа билээ.
Сэтгэгдэл (0)
Сэтгэгдэл бичигдээгүй байна