Аж үйлдвэр, эрдэс баялгийн сайд Ц.Туваан Австрали улсын Сидней хотноо энэ сарын 29-31-ний өдрүүдэд зохион байгуулагдаж буй “IMARC 2024” Олон улсын эрдэс баялгийн чуулга уулзалтад оролцож байна.
Дэлхийн уул уурхайн салбарын тэргүүлэгчид, салбарын мэргэжилтнүүд болон оролцогч талуудыг нэгтгэсэн уг арга хэмжээ арван нэг дэх жилдээ зохион байгуулагдаж байгаа юм.
Манай улсаас УИХ-ын гишүүд, уул уурхайн ТӨҮК-уудын удирдлагууд, Уул уурхайн үндэсний ассоциацийн төлөөлөл, Элчин сайд Д. Даваасүрэн, хатагтай Кэти Смит нар оролцож, Монголын хөрөнгө оруулалтын боломжууд, хууль эрх зүйн орчныг танилцуулахаас гадна томоохон төсөл хэрэгжүүлэгчид өөрсдийн төслүүдийн явцыг танилцуулна.
Чуулганы нээлтийн хэлэлцүүлгүүд нь "Чухал ашигт малтмалын нэмүү өртгийн сүлжээг байгуулах нь" сэдвээр өрнөж, ногоон технологи болон эрчим хүчний шилжилтийг түргэсгэхэд нэн чухал эрдсүүдийн тогтвортой, найдвартай ханган нийлүүлэлтийн сүлжээг бий болгох шаардлагыг онцлон ярилцаж байна.
"IMARC 2024" арга хэмжээнд 300 гаруй компани, түүний дотор 90 гаруй уул уурхайн компани оролцож, салбарын хамгийн сүүлийн үеийн шинэчлэл, хөгжлийг танилцуулна. Нийт 9000 гаруй оролцогчид салбарын хөгжлийн талаар хэлэлцүүлэг өрнүүлж, хамтын ажиллагааг бэхжүүлэх өргөн боломжийг олгох юм.
Монгол Улс "IMARC 2024" арга хэмжээнд идэвхтэй оролцсоноороо олон улсын түншлэлээ хөгжүүлэх, дэлхийн уул уурхайн салбарт эзлэх байр сууриа бэхжүүлэх эрмэлзлээ илэрхийлж байна.
Сэтгэгдэл (0)
Сэтгэгдэл бичигдээгүй байна