Абу-Дабид болсон UFC 308 тулаанд хагас хөнгөн жин /66 кг/-гийн Дэлхийн аваргын бүсээ гүрж гаралтай Илия Топурия хамгаалж, нокаутад ордоггүй, удах тусмаа улам тэвчиж, чангардаг Макс Холловэйг гуравдугаар раундад нокаутаар яллаа. Макс Холловэйг нокаутаар ялсан анхны тулаанч болсныг нь онцгойлон дурдаж байна.
Ийнхүү Илия Топурия санаандгүйгээр юмуу азаар Дэлхийн аваргын бүсийг хүртээгүй гэдгээ нотолж, 16 тулаанд бүгдэд нь ялалт байгууллаа.
“Макс Холловэй гэж ийм гайхамшигтай домогт тулаанчийг ялсандаа би итгэж чадахгүй нь ээ. Энэ хүний замналыг би харж өссөн. Дараа дараачийн үеийнхэнд үлгэр жишээ болсон тулаанч. Түүний тулааныг шимтэн үзэж, үлгэр дуурайлал авсан үеийнхний нэг нь би өөрөө байна. Би түүнийг маш их хүндэлдэг. Баруун цохилт орсны дараа түүнийг манарсныг мэдэрсэн. Тэр үед булангаас ч над руу “Одоо дуусга” гэж хашхирсан. Би хийх ёстой зүйлээ хийлээ” хэмээн ялалт байгуулсныхаа дараа Илия Топурия өгүүлжээ.
Түүнээс цаашид яах бодолтой байгааг асуухад “Яг одоо би хэнтэй ч зодолдмооргүй байна аа” гээд инээмсэглэснээ “Гэхдээ Волкановски даага нэхэх тулаан хийх эрхтэй. Түүнд тийм боломж олгох ёстой” гэжээ.
Сэтгэгдэл (0)
Сэтгэгдэл бичигдээгүй байна