Аж үйлдвэр, эрдэс баялгийн яамны Судалгаа, хөрөнгө оруулалтын газрын Статистик судалгааны хэлтсийн дарга Б.Дэлгэржаргал Бүгд Найрамдах Чех Улсын Элчин сайдын яамны Худалдаа, эдийн засгийн хэлтсийн дарга Вацлав Ийлекийг хүлээн авч уулзжээ.
Уулзалтын эхэнд Б.Дэлгэржаргал хоёр улс уул уурхай, геологийн салбарын харилцаа, хамтын ажиллагааны олон жилийн түүхтэйг тэмдэглэсэн байна. Сүүлийн жилүүдэд энэхүү хамтын ажиллагааг эрчимжүүлэх чиглэлээр идэвхтэй ажиллаж байгааг дурдаад Монгол Улсын Их Хурлын сонгуулийн дүнд байгуулагдсан хамтарсан Засгийн газраас ирэх 4 жилд хэрэгжүүлэх үйл ажиллагааны хөтөлбөрөө баталсныг онцолжээ.
Уулзалтын үеэр талууд нүүрсний уурхайн технологийн шинэчлэл, уурхайн нөхөн сэргээлт, хаалт болон аж үйлдвэр, эрдэс баялгийн чиглэлээр үйл ажиллагаа явуулдаг компани, аж ахуйн нэгжүүд хооронд холбоо тогтоож хамтран ажиллах, ногоон хөгжил, цэвэр эрчим хүчний шилжилттэй холбоотой асуудлаар харилцан санал солилцсон байна.
Вацлав Ийлек ирэх оны наймдугаар сард Монгол Улсын уул уурхайн компани, аж ахуйн нэгжүүдийг БНЧУ-д айлчлуулахаар төлөвлөж байгаа талаар мэдэгджээ.
Сэтгэгдэл (0)
Сэтгэгдэл бичигдээгүй байна