БНХАУ-ын Тяньжинь хотод зохион байгуулагдаж буй “China Mining 2024” олон улсын уул уурхайн үзэсгэлэн, арга хэмжээнд Монгол Улсаас Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар тэргүүтэй бүрэлдэхүүн оролцож, “Монголын уул уурхай” салбар хуралдааныг зохион байгууллаа.
Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар уг арга хэмжээний үеэр Төрөөс аж үйлдвэр, эрдэс баялгийн салбарт баримталж буй бодлого, Монголын Улсын Засгийн газраас аж үйлдвэр, эрдэс баялгийн салбарт хэрэгжүүлж буй төслүүдийг танилцуулж илтгэл хэлэлцүүлжээ.
Хуралдааны үеэр БНХАУ-ын Байгалийн нөөцийн сайд, Хятадын Уул уурхайн ассоциацын ерөнхийлөгч, мөн манай улсын эрдэс баялгийн салбарт ажиллаж байгаа болон хөрөнгө оруулах сонирхолтой компаниудын төлөөллүүдтэй тусгайлан уулзаж, цаашид аж үйлдвэр, эрдэс баялгийн салбарт хамтран ажиллах талаар санал солилцсон байна.
“China Mining” үзэсгэлэн, арга хэмжээ нь 1999 оноос хойш 26 дахь жилдээ зохион байгуулагдаж буй геологийн судалгаа, хайгуул, ашиглалт, техник технологийн хөрөнгө оруулалтыг хамарсан дотоод болон гадаадын хөрөнгө оруулагч, ханган нийлүүлэгч, төр, хувийн хэвшлийг оролцоог хангасан эрдэс баялгийн салбарын томоохон арга хэмжээ юм.
Тус арга хэмжээнд 70 гаруй улсын 500 гаруй компани, 1000 гаруй төлөөлөгч оролцож байгаа юм. Энэхүү үзэсгэлэн, арга хэмжээгээр дэлхийн уул уурхайн салбарын хөгжлийн чиг хандлага, хөрөнгө оруулалт, хөгжлийн боломжуудыг эрэлхийлсэн форумууд зохион байгуулагддагаараа онцлог аж.
Энэ удаагийн арга хэмжээ нь ногоон эдийн засаг ба инновац, дотоод, гадаадын геологийн хайгуулын шинэ нээлтүүд, судалгаа, аж үйлдвэржилтийн бодлого руу чиглэж байна.
Сэтгэгдэл (0)
Сэтгэгдэл бичигдээгүй байна