ТЭТГЭВРИЙН САН ДАРЬТАЙ ТОРХНООС ЯЛГААГҮЙ БАЙНА

Гэр бүл, хөдөлмөр, нийгмийн хамгааллын сайд Л.Энх-Амгалан УИХ-ын Нийгмийн бодлогын байнгын хорооны гишүүдэд салбарын эрхзүйн орчны шинэчлэл, 2024-2028 оны үйл ажиллагааны хөтөлбөрөө танилцуулах үеэрээ "Тэтгэврийн сан дарьтай торхноос ялгаагүй байна" гэж мэдэгджээ. 

2024-2028 онд ажилгүйдэл, ядуурлын түвшинг 2 дахин бууруулж, нэг хүнд ногдох дотоодын нийт бүтээгдэхүүнийг 8-10 мянган ам.долларт хүргэх, хүний хөгжлийн индексээр 10 байр урагшлах бодлогын томоохон зорилт дэвшүүлсэн байна. 

Танилцуулгаас зарим зүйлийг онцолвол: 

• Өнөөдрийн байдлаар манай улсад 983.485 гэр бүл байна. 5 гэр бүл тутмын 1 нь орон сууцны асуудалтай, 3 гэр бүл тутмын 1 нь санхүүгийн асуудалтайн улмаас жил дунджаар 4000 гаруй хос гэрлэлтээ цуцлуулж байгаа мэдээлэл бий.  
• Гэр бүлд суурилсан хөдөлмөр эрхлэлт, нийгмийн үйлчилгээг хөгжүүлэхээр гэр бүлд чиглэсэн хууль эрх зүйн орчныг боловсронгуй болгож, аймаг, дүүрэг бүрд гэр бүлийн сэтгэлзүйчтэй болох боломжийг бүрдүүлсэн.
• Орлогод нийцсэн орон сууц хөтөлбөрийн хүрээнд залуу гэр бүлүүдээ түлхүү хамруулна.
• Нийгмийн даатгалын шинэчлэлийн хүрээнд тэтгэврийг жил бүр инфляцтай уялдуулан нэмэгдүүлж, тэтгэврийг өвлүүлдэг болгосон.
• Цаашид хувийн тэтгэврийн тогтолцоог бүрдүүлж, нийгмийн даатгалын санг ил тод болгох, үйлчилгээгээ хиймэл оюун ухаанд тулгуурлан цахимжуулж, виртуал хэлбэрт шилжүүлэх зорилт дэвшүүллээ.
• Халамжийн давхардлыг арилгаж, ядуурлыг арилгахад халамжаас хөдөлмөрт шилжих бодлого баримталж, нийгмийн халамжийг зөвхөн зорилтот бүлэгтээ хүргэнэ.
• Хөдөлмөрийн чадвар алдалтын тогтоодог 97 өвчнийг хугацаагүйгээр тогтоож, хүнд суртлыг арилгалаа.
• Ирэх жилүүдийн хамгийн томоохон зорилт бол бүтээмжийн хувьсал болж,  бүтээмж дагаж цалин өсдөг тогтолцоо руу шилжинэ.
• Харин тэтгэврийн сан дарьтай торхноос ялгаагүй байна. Нөхөн даатгалын тухай хууль, хөнгөлөлттэй нөхцөлөөр тэтгэвэр тогтоох, тэтгэвэр тогтоох дараалсан 7 жилийг 5 жил, жил өсгөн тооцох зэрэг  шийдвэрээс шалтгаалан тэтгэврийн санд 4.7 их наяд төгрөгийн алдагдал үүсжээ.
• 2025 оноос Эхийн алдар 2-р зэргийн одонд 200 мянга, 1-р зэргийн одонд 400 мянган төгрөг болгож 2 дахин нэмэгдүүлсэн.
• Ахмад настнуудын асаргааны хувилбарт үйлчилгээ, төрөлжсөн асрамжийн үйлчилгээг нэвтрүүлэх, гэр бүлийн хүчирхийллээс хамгаална.
• Хүнд хэлбэрийн хөгжлийн бэрхшээлтэй хүүхдүүдийн тэтгэмжийг 30 хувиар нэмэгдүүлж, хөдөлмөр, хөдөлгөөн засал, хэл засал, асран хамгаалагчдад нь зөвлөгөө өгөх зэрэг дэмжих төвүүдийг улсын хэмжээнд нэвтрүүлэхээр зорьж байна.