Японы Жүдо Бөхийн Холбоо эрэгтэй болон эмэгтэй шигшээ багийн шинэ ахлах дасгалжуулагчдын нэрсийг зарлалаа. Эрэгтэй шигшээ багийг Кэйжи Сузуки, эмэгтэй шигшээ багийг Маки Цүкада нар удирдахаар болсон байна.
2020-2024 онд шигшээ багийнхаа дасгалжуулагчаар ажилласан 2004 оны олимпын аварга, эдүгээ 44 настай Кэйжи Сузукид дахин итгэл хүлээлгэж, үргэлжлүүлэн ажиллуулахаар болжээ. Японы жүдогийн шигшээ багийн ахлах дасгалжуулагчаар хамгийн дээд тал нь 8 жил ажиллах боломжтой байдаг. Эхний 4 жилдээ сайн ажиллавал дахиад 4 жилээр сунгаж ажиллуулж болдог. Үүнээс илүү олон жилээр сунгаж ажиллуулдаггүй журамтай юм.
2004 оны олимпын аварга, эдүгээ 42 настай Маки Цүкада Японы эмэгтэйчүүдийн шигшээ багийн ахлах дасгалжуулагчаар томилогдсон байна. Ингэснээр Японы шигшээгийн анхны эмэгтэй ахлах дасгалжуулагч боллоо.
Парисын олимпын наадамд Японы эмэгтэй жүдочид нэг алт, нэг хүрэл медаль хүртсэн нь түүхэн дэх хамгийн муу үзүүлэлт нь болсон. Тиймээс ч Цүкада хэвлэлийн бага хурал дээр “Би Японы жүдог эргэн сэргээхийн тулд бүх сэтгэл зүрхээ зориулан, маш өндөр хариуцлагатай ажиллана” гэж мэдэгджээ.
Үүнтэй уялдуулаад сануулахад, Парисын олимпын наадамд аварга төрүүлж чадаагүй гэсэн үндэслэлээрХалиуны Болдбаатар Монголын жүдо бөхийн шигшээ багийн ахлах дасгалжуулагчийн ажлаа өгч, түүний оронд У.Эрдэнэбаатарыг хэдхэн хоногийн өмнө томилсон. У.Эрдэнэбаатар нь ОХУ-д ажиллаж, олон шилдэг бөхийг бэлдэж, том амжилтад хүргэжээ.
Сэтгэгдэл (0)
Сэтгэгдэл бичигдээгүй байна