Монгол Улсад орчин цагийн эм зүйн салбар үүсэж хөгжсөний 101 жилийн ойн хүрээнд зохион байгуулагдаж буй “Эрүүл мэндийн технологи-2024” олон улсын үзэсгэлэн Мишээл экспо төвд 2024 оны аравдугаар сарын 4-6ны өдрүүдэд болж байна.
Эрүүл мэндийн салбарын инновац, дэвшилтэт техник технологи, бүтээгдэхүүн, үйлчилгээг сурталчлан таниулах, төр болон хувийн хэвшил, гадаад дотоодын аж ахуйн нэгж байгууллагуудын хамтын ажиллагааг өргөжүүлэх зорилготой уг үзэсгэлэн уламжлал болж 25 дахь удаагаа гарч буй нь энэ юм.
Үзэсгэлэнд улсын болон хувийн эмнэлэг, тоног төхөөрөмж ханган нийлүүлэгч, эмийн үйлдвэр, эм, эмнэлгийн хэрэгсэл ханган нийлүүлэгч зэрэг нийт 70 орчим байгууллага оролцож, эрүүл мэндийн салбарын технологийн дэвшлийг нийслэл, орон нутгийн эрүүл мэндийн байгууллага, ард иргэдэд танилцуулахын сацуу үнэ төлбөргүй үзлэг оношилгоо хийж, эрүүл мэндийн салбарт нэвтрүүлсэн шинэ техник технологи, оношилгоо эмчилгээний шилдэг арга туршлагаа танилцуулах юм.
Тухайлбал, Гэмтэл согог судлалын үндэсний төвийн эмч мэргэжилтнүүд уг үзэсгэлэнгийн үеэр эмнэлгийн тусламж үйлчилгээнд нэвтрүүлсэн дэвшилтэт технологио танилцуулан, гэмтэл согогийн нарийн мэргэжлийн үзлэг, үений ЭХО аппаратаар оношилгоо хийж, шаардлагатай зөвлөгөө мэдээллийг үйлчлүүлэгчдэд хүргэж байна.
Мөн үзэсгэлэнгийн хүрээнд: 
Эрүүл мэндийн салбарт шинээр нэвтэрсэн эмчилгээ, оношилгооны дэвшилтэт технологийг таниулах, Дотоодын үйлдвэрлэгч, ханган нийлүүлэгч байгууллагын бүтээгдэхүүнийг хэрэглэгчдэд сурталчлан таниулж, үйлдвэрлэгч-импортлогч-хэрэглэгчийн хооронд дөт холбоо тогтоох, тэдний хамтын ажиллагааг бэхжүүлэх, Бусад улсын үйлдвэрлэгч, ханган нийлүүлэгч байгууллагын бүтээгдэхүүнийг дотоодын зах зээлд сурталчлан таниулах, Эрүүл мэндийн технологи, эм, эмнэлгийн хэрэгсэл, тоног төхөөрөмжийн чиглэлээр сургалт, хэлэлцүүлэг зохион байгуулах, харилцан туршлага судлах үйл ажиллагааг зохион байгуулах юм.
Сэтгэгдэл (0)
Сэтгэгдэл бичигдээгүй байна