​НЭГДҮГЭЭР АНГИЙН СУРАГЧДАД ХАРАА ШАЛГАХ ЭРТ ИЛРҮҮЛГИЙН ҮЗЛЭГ ХИЙНЭ

Дэлхийн эрүүл мэндийн байгууллагын судалснаар засагдаагүй хугарлын гажиг нь сургуулийн хүүхдийн хараа муудалтын тэргүүлэх шалтгаан болдог ба ойрын жилүүдэд огцом ихсэх хандлагатай байна. Хүүхдийг бага насанд нь үр дүнтэй ба үр ашигтай харааны урьдчилан сэргийлэх үзлэгт хамруулж, хараа муу илэрсэн хүүхдэд нүдний иж бүрэн үзлэг хийж тохирсон шилийг зүүлгэх эсвэл эмчилснээр хүүхдийн хараа хамгаалах тогтолцоо үүсэх юм.

Сургуульд суурилсан эрүүл мэндийн хяналт тандалтын тогтолцоо бүрдүүлэх, 6 настай хүүхдийг нүд, шүд, зүрхний эрүүл мэндийн эрт илрүүлэг үзлэгийн тогтолцоо бий болгох зорилгын хүрээнд Боловсролын яам, Эрүүл мэндийн яам, Боловсролын ерөнхий газар, “Орбис” Интернэйшнл олон улсын байгууллага хамтран Нийслэлийн ЕБС-ийн нэгдүгээр ангийн сурагчдын харааг шалгах эрт илрүүлгийн үзлэг хийх сургуулийн эмч, нийгмийн ажилтан нарыг чадавхжуулах сургалтыг Баянзүрх, Хан-Уул дүүргийн төрийн болон хувийн өмчийн ерөнхий боловсролын 50 эмч, нийгмийн ажилтныг хамруулан зохион байгууллаа. Сургалтын сургагч багшаар ЭМЯ, “Орбис” Интернэйшнл олон улсын байгууллагын бэлтгэсэн 11 мэргэжлийн нүдний эмч нар ажиллалаа.

Тус сургалтаар:
• Нүдний эрүүл мэндийн боловсрол олгох аргачлал, хүүхдийн хараа, түгээмэл тохиолдох нүдний эмгэг
• Хол, ойр, стерео хараа шалгах аргачлал
• Харааны асуудалтай хүүхдийг дараагийн шатлалд илгээх журам
• 6 настай хүүхдийн эрүүл мэндийн үзлэгийн зохион байгуулалт, хамтрагч байгууллагуудын оролцоо
• Үзлэгийн маягтад тэмдэглэл хийж нүдний үзлэгийн бүртгэлийг www.eruulhuuhed.mn вэбэд суурилсан цахим програмд хэрхэн оруулах талаар онол, дадлага хосолсон хэлбэрээр суралцаж хүүхдийн харааны үзлэгийг бие даан гүйцэтгэх шалгалт өглөө.
Мөн сургалтын үеэр 12 настай 76 сурагчийг харааны эрүүл мэндийн урьдчилан сэргийлэх үзлэгт хамруулж мэдээлэл зөвлөгөө өгч ажиллажээ.

Нийслэлийн 277 сургуулийн эмч, нийгмийн ажилтан нарт хараа шалгах аргачлал болон эцэг эх, хүүхдүүдэд нүдний эрүүл мэндийн боловсрол олгох харилцааны ур чадварыг эзэмшүүлснээр Улаанбаатар хотын улсын болон хувийн сургуулийн орчинд хараа шалгах чадавхыг бий болгож нийслэлийн 6 настай сурагчдыг харааны эрт илрүүлэг үзлэгт хамруулж, харааны асуудалтай илэрсэн хүүхдэд нүдний нарийн мэргэжлийн эмч нар бүрэн үзлэг хийх юм.