Аж үйлдвэр, эрдэс баялгийн сайд Ц.Туваан АНУ-аас Монгол Улсад суугаа элчин сайд Р.Буанганыг хүлээн авч уулзжээ.
Элчин сайд Р.Буанган өнгөрсөн долоо хоногт Монгол, АНУ хоорондын иж бүрэн түншлэлийн харилцааг бий болгосныг уулзалтын эхэнд тэмдэглэж, эрдэс баялгийн салбарт чухал ашигт малтмалын хайгуул, олборлолт, боловсруулалт дээр хамтран ажиллах хүсэлтэй буйгаа илэрхийлсэн байна. Түүнчлэн хоёр улс хоорондын эрчим хүчний яриа хэлэлцээрийг зохион байгуулахаар төлөвлөж буйг дурдаад Аж үйлдвэр, эрдэс баялгийн яамны үндсэн арга хэмжээ болох Уул уурхайн долоо хоног “Mining Week 2024” арга хэмжээнд оролцохоо мэдэгджээ.
Аж үйлдвэр, эрдэс баялгийн сайд Ц.Туваан Эрдэс баялгийн салбарын хөгжил, хөдөлмөрийн хамтын ажиллагааны тухай санамж бичгүүдийг цааш үргэлжлүүлэн ажиллахаа онцолсон аж. Мөн аж үйлдвэр, эрдэс баялгийн салбарт гаднын хөрөнгө оруулагчдыг дахин татах хууль эрх зүйн орчныг тогтвортой байлгах, боловсронгуй болгох асуудал дээр нээлттэй хамтарч ажиллах, санал солилцоход бэлэн буйгаа тэмдэглэжээ. Түүнчлэн өнгөрсөн жилүүдэд геологи хайгуулын салбараа орхигдуулсан тул алдагдсан цаг хугацаагаа орчин үеийн дэвшилтэт технологиор нөхөх бодлого баримталж буй бөгөөд энэ салбарт АНУ-тай хамтран ажиллах хүсэлтэй байгаагаа дахин илэрхийлсэн байна.
Элчин сайд Р.Буанган Гадаадын хөрөнгө оруулалт татах асуудлаар хамтран ажиллах, эрчим хүчний засаглалын хөтөлбөр, хайгуулын төслүүдийг хэрэгжүүлэх, жишиг төсөл болгох асуудлаар хамтран ажиллахаа мэдэгджээ.
Талууд цаашдаа олон талт яриа хэлэлцээрүүдийг хийж, хамтын ажиллагаагаа өргөжүүлэхээр болов.
Сэтгэгдэл (0)
Сэтгэгдэл бичигдээгүй байна