Эрүүл мэндийн сайд Т.Мөнхсайхан Канад Улсын Бритиш Колумбиагийн их сургуулийн профессор, Лаурел мэс заслын сангийн УЗ-ийн гишүүн, төслийн удирдагч Хью Парсонс, тус сангийн УЗ-ийн нарийн бичгийн дарга Кристин Туано нарыг хүлээн авч уулзлаа.
Лаурел сан манай улсад нүдний эрүүл мэнд, тусламж үйлчилгээний чиглэлээр төслийг 2015 оноос хэрэгжүүлж эхэлсэн бөгөөд төслийн хүрээнд Монголын нүдний эмч нарын эмчилгээний болон мэс заслын ур чадварыг бэхжүүлэхээс гадна эрүүл мэндийн үйлчилгээ авах боломжгүй, алслагдсан газарт оршин суудаг иргэдэд үнэ төлбөргүй эрүүл мэндийн тусламж үйлчилгээ үзүүлдэг юм.
Хью Парсонс уулзалтын үеэр монголчууд, ялангуяа хөдөөгийн иргэдийн дунд нүдний өвчлөл элбэг байгаа нь хараагүй болох эрсдэлд хүргэж болох учраас өвчлөлөөс сэргийлэх, эрт илрүүлэхэд анхаарах, эмч мэргэжилтнүүдийн чадавхийг сайжруулах, боловсролыг дээшлүүлэх асуудлыг хөндлөө. Мөн нийслэл төдийгүй алслагдмал аймаг, сумдын эмч нарт ажлын байран дээрх сургалтыг хийж, нүдний тусламж үйлчилгээ үзүүлэх ур чадварыг нэмэгдүүлэхэд зориулж, нүд судлалын резидентийн сургалтыг сайжруулах хөтөлбөрийг Монгол Улсын эрүүл мэндийн салбарын онцлогт тохируулан боловсруулснаа хэлээд үүнд хамрагдах боловсон хүчнийг сонгох асуудалд анхаарч өгөхийг хүсэв.
Эрүүл мэндийн сайд Т.Мөнхсайхан Монгол Улс хүн амынхаа эрүүл мэндэд онцгой анхаарч, эрт илрүүлэг хөтөлбөрийг амжилттай хэрэгжүүлж байгаа, энэ жилээс сургуульд суурилсан эрт илрүүлгийг эрчимтэй хийхээр ажиллаж байгааг онцлов. Тэрбээр мөн "Тооцоолж байгаагаар ЕБС-ийн хүүхдүүдийн 21 хувь нь нүдний өөрчлөлттэй байх магадлалтай. Энэ тал дээр бид онцгой анхаарна. Резидент эмч нарын сургалтын хөтөлбөрт анхаарах асуудал бий. Нүдний мэс засал бол маш нарийн ур чадвар шаарддаг. Тиймээс танай сантай хамтран мэс заслын эмч нараа олон улсын түвшинд хүргэж, чанарыг нь сайжруулах тал дээр хамтарч ажиллахад бэлэн байна" гэлээ.
Сэтгэгдэл (0)
Сэтгэгдэл бичигдээгүй байна