ХОЁР НАСТАЙ Е.ДАМИР ХҮҮ БНСУ-Д ЭМЧЛҮҮЛЭЭД ЭХ ОРОНДОО ИРЛЭЭ

Жижиг, дунд үйлдвэрийн газраас санаачлан БНСУ-ын Сөүл хотын Дүнгдэмүн дүүргийн ИТХ-ын дэд дарга Чонг Сонг Ёнг болон тус улсын Ханлим их сургуулийн Ханганг Сонгшим түлэнхийн мэргэшсэн эмнэлэгтэй хамтран жил бүр 2 хүүхдийг үнэгүй эмчлүүлэхээр болсон.

Энэ ажлын хүрээнд хоёр настай Е.Дамир хүү БНСУ-д хоёр сар орчим хугацаанд эмчлүүлээд  эх орондоо ирлээ. Хүү 5 удаагийн хагалгаанд орсон бөгөөд зовиур багасч цовоо, сэргэлэн болжээ. Хүү ирэх жил бас дахин хагалгаанд орно.  

Дашрамд дурдахад Жижиг, дунд үйлдвэрийн газраас хүнд түлэгдэлтэй бага насны хүүхдийн судалгааг хийсний үндсэн дээр Баян-Өлгий аймгийн харьяат Еркебулан овогтой Дамир хүү сонгогдсон. Тэрбээр одоогоос жил орчмын өмнө нүүр, хоёр гар, хүзүү, цээж хэсгээр 45 хувьтай 3В зэргийн хүнд түлэгдсэн бөгөөд Гэмтэл согог судлалын үндэсний төвийн харьяа Түлэнхийн төв эмнэлэгт эрчимт эмчилгээний тасагт  28 хоног ухаангүй байж, эмийн эмчилгээ болон нөхөн сэргээх хагалгаанд 4 удаа ороод байсан юм. 

Ээж хүү хоёрыг БНСУ-д эмнэлэгт эмчлүүлэх хугацаанд асарч, эмнэлгээс гараад харих хүртэл БНСУ-ын Сөүл хотын Дүнгдэмүн дүүргийн ИТХ-ын дэд дарга Чонг Сонг Ёнг болон түүний гэр бүл гэртээ байлгаж, өөрийн үр хүүхэд мэт санаа тавьж байжээ.