Парисын зуны олимпын наадамд оролцохоор Жэйлэн Браунаас бусад өнөө цагийн NBA-гийн одод АНУ-ын шигшээдээ бултаараа багтан очсон. Гэхдээ тэд бусад тамирчдын адил Олимпын хотхонд байрласангүй.
Олимпын хотхонд ойролцоогоор 14 мянган тамирчин байрласан гэсэн мэдээ бий. Гэвч тэдний дунд Леброн Жэймс, Стивен Көрри нарын зэрэг NBA-гийн одод байхгүй. Гэхдээ энэ нь Олимпын хотхоны анти-секс ороос зайлсхийсэндээ биш, Жоэль Эмбиидийн өндөрт таарах өрөө байр олдоогүйдээ биш юм.
1992 оны Барселоны олимпын наадамд домогт Майкл Жордантай Мөрөөдлийн багийнхан очиход л АНУ-ын Сагсанбөмбөгийн Холбоо өөр газар байрлуулж, аюулгүй байдал, ая тухыг хангаж эхэлжээ.
Forbes-ийн мэдээлснээр бол энэ удаа Олимпын наадамд оролцохоор 14 хоногийн хугацаатай очсон NBA-гийн оддын зардалд Сагсанбөмбөгийн Холбоо нь 15 сая ам.доллар зарцуулж байгаа гэнэ. Энэ багийн тамирчдын жилийн орлого нь 600 сая гаруй ам.доллар учраас тэрбумтан, саятнуудыг ая тухтай, аюулгүй байлгахын төлөө чадах бүхнээ хийж, яг хаана байрласныг нь чандлан нууцалжээ.
2008 оны Бээжингийн олимпын наадамд АНУ-ын сагсанбөмбөгийн шигшээ багийнхны буусан газрыг хөгжөөн дэмжигчид олж мэдчихээд Коби Брайантыг харахаар очиж, их төвөг удсан удаатай. “Үнэндээ энэ их төвөгтэй юм аа. Би олны дунд ороод анзаарагдахгүй байя гэж бодсон чинь болсонгүй. Бусдаас ялгармааргүй байна” хэмээн Коби Брайант бухимдаж байлаа.
“Бид олимпын хотхоноос өөр газар байрласан. Гэхдээ өөр ямар нэгэн тэмцээн үзье гэх юмуу олимпын хотхонд очъё гэвэл чөлөөтэй” хэмээн Кевин Дюрант өгүүлсэн байна.
Сэтгэгдэл (0)
Сэтгэгдэл бичигдээгүй байна