Парисын зуны олимпын наадмын сагсанбөмбөгийн эрэгтэйчүүдийн АНУ-Сербийн тоглолт 110:84-өөр өндөрлөсөн. Итгэлтэйгээр хожсон АНУ-ын шигшээ багт “Бостон”-ы од Жэйсон Тэйтүм байсан ч дасгалжуулагч Стив Керр талбайд гаргасангүй. Тоглолтын дараагаар үүндээ тайлбар хийсэн байна.
“40 минутад 10 тоглогчийг бүгдийг нь гаргаж тоглуулах хэцүү гэдгийг ойлгох хэрэгтэй. Кевин Дюрант эдгээд тоглох боломжтой болсон учраас би илүү хэрэгтэй, найдвартай гэсэн комбинацийг сонголоо. Ер нь үүнийгээ эргээд бодоход ч солиотой юм шиг л санагдаж байна. Багийнхаа бүрэлдэхүүнийг харахаар л өөрийгөө галзуурч гэж бодоод байгаа хүн шүү дээ, би.
Жэйсон Тэйтүм бол Дэлхийн шилдгүүдийн нэг. Би түүнд тайлбарлаж хэлсэн. Тэр ч мэргэжлийн тамирчны хандлагаар намайг ойлгон хүлээн авсан. Энэ удаад тоглоогүй гээд тэмцээний туршид тоглохгүй гэсэн үг биш шүү дээ. Ямар ч байсан энэ тэмцээнд өөрийн хувь нэмээр оруулах л болно. NBA-гийн талаар бодолгүй, энд зургаан тоглолтод хожих ёстой гэдгээ залуус маань ойлгож байгаа. Жэйсон бол мэргэжлийн тамирчин, лигийн аварга. Дараа дараачийн тоглолтод тэр бэлэн байх болно” хэмээн Стив Керр өгүүлжээ.
Сэтгэгдэл (0)
Сэтгэгдэл бичигдээгүй байна