Энэ сарын 14-нд Мэргэжлийн сумогийн Нагоя башё эхэлнэ. Озэки цолоо алдсан Киришима Б.Лхагвасүрэн ирэх башёд 10 давж байж цолоо эргүүлэн авах ёстой. 10 давж чадахгүй бол дахиад озэки цолны төлөө дайрах ёстой болно.
Киришимагийн хүзүү гэмтсэн учир өрсөлдөгчтэйгээ ширүүн тулж чадахгүй байгаа. Тиймээс сүүлийн башёд тааруухан барилдсан. Харин Нагоя башёгийн өмнө Арасио, Тацүнами болон Сакаигава зэрэг хүчтэй бөхчүүдтэй дэвжээнд очиж бэлтгэл хийжээ.
Арасио дэвжээнд хоёр хоног бэлтгэл хийснийхээ дараагаар Тацүнами дэвжээнд зочлон, озэки Хошёорюү, маэгаширагийн 1 дээр эрэмбэлэгдсэн Мэйсэй нартай хүнд барилдаанууд хийж, бэлтгэлээ хангасан байна. Үүнийхээ дараагаар Сакаигава дэвжээний бөхчүүдтэй бэлтгэл хийж, Хирадоумитай хэд хэдэн удаа тулжээ.
Ингэж бэлтгэл хийснийхээ дараагаар Киришима “Би ийм хүнд бэлтгэл барилдаан хийж болж байгаа юм чинь ирэх башёд дажгүй сайн барилдчихна гэж бодож байна. Ер нь хүзүүгээрээ ашиглаж барилдахгүй л бол цаашид сумод үргэлжлүүлэн барилдаж чадахгүй шүү дээ. Тиймээс хүзүүний гэмтлээ эдгээж, хүнд хэцүүг давж гарах л ёстой” хэмээн өгүүлсэн байна.
Киришимад маш их урам зориг өгч буй нэг дасгалжуулагч байгаа сурагтай. Тэр нь түүний дөрвөн настай охин. Охин нь аавдаа “Аав аа, та түрүүлээрэй!” гэж тушаал буулгасан гэнэ.
Сэтгэгдэл (0)
Сэтгэгдэл бичигдээгүй байна