Нацу башёд 12 даваатайгаар түрүүлсэн 24 настай Оносато Дайки ердөө жилийн л өмнө мэргэжлийн сумогийн дохёд анх удаагаа гарсан. Жилийн хугацаанд долоон башёд барилдахдаа 6:1, 4:3, 12:3, 12:3, 11:4, 11:4, 12:3 гэсэн амжилт үзүүлээд байна.
Тэгвэл Оносато болон түүний аавтай холбоотой нэгэн сонирхолтой мэдээллийг цацсан байна. Аавыг нь Томоюүки Накамура гэдэг. Цагтаа сумо барилдаж явсан. Гэхдээ сонирхогчдын түвшинд барилддаг байж. Тиймээс ч хүүгээ сумо руу хөтөлж, өдий зэрэгт хүрэхэд их нөлөө үзүүлжээ.
“Аав минь сумо барилдаж сурахад маш их нөлөөлсөн. Бид сумочийн гэр бүл гэж хэлэх дуртай. Хүүхэд байхаас минь л дэмжсэн. Би ч гэсэн аавыгаа барилдахад нь үргэлж дэмждэг байлаа” хэмээн Оносато өгүүлсэн байна.
Оносато буюу Дайки Накамура өсвөр насандаа сумогоор дагнан хичээллэхээр Ниигатагийн сургуульд очиж, суралцжээ. Тэнд сурч эхэлснээсээ хойш аавдаа хааяа “томрох” болсон гэнэ. “Би одоо Ниигатагийн сумоч болсон. Надад битгий сумо барилдахыг заах гээд бай” хэмээн аавдаа хэлснээр бүрэн бие дааж эхэлснээ илэрхийлжээ.
Хүүгээ дунд сургууль төгсөж, Хакүхогийн цомд түрүүлж, Шилдэг сумочоор тодроход аав нь хоёулаа барилдаж үзье гэжээ. Тэгэхэд хүү нь 15 настай байлаа. Саяхан том тэмцээнд түрүүлсэн хүүгээ сорьж үзэхийг хүссэн нь тэр биз. Магадгүй “Би одоо ч гэсэн давна” гэж бодсон байж ч болно. Гэвч тэр өдөр тэгж барилдсанаар аав нь сумочийн замналдаа цэг тавьжээ.
“Үнэндээ би хүүтэйгээ сайхан барилдаад сумочийн замналдаа цэг тавъя л гэж бодсон юм. Хүүдээ ялагдаад, сумочийн замналаа дуусгахдаа их баяртай байсан” хэмээн Томоюүки Накамура ярьжээ.
Сэтгэгдэл (0)
Сэтгэгдэл бичигдээгүй байна