Сумочид дундаа хамгийн намхан бас хөнгөнд тооцогдох 29 настай Энхо ирэх долоодугаар сарын башёд барилдахаар бэлдэж байна.
Жилийн өмнө буюу 2023 оны тавдугаар сарын башёд Жюүрёо зиндааны барилдааны үеэр хүзүүндээ маш хүнд гэмтэл авснаас хойш 6 башё барилдаагүй тул түүний эрэмбэ жонидан хүртэл буусан.
168 сантиметр өндөртэй, 100 кг жинтэй Энхог хүнд гэмтэл авч, зиндаа их доошилсон тул зодог тайлахыг хэн хүнгүй зөвлөсөн юм билээ. Гэвч өөрөө барилдана гэж зүтгэсэн тул мэс засал хийлгэхээс татгалзсан юм.
“Миний бие эрүүл сайн байгаа. Гэмтэл эдгэж, мөдхөн эргээд дэвжээнээ гарна гэдэгтээ итгэлтэй байна. Гэмтэл маань яг төлөвлөсний дагуу эдгэж байна” хэмээн Энхо ярьжээ. Барилдааны явцад гэмтэл авснаар ухаан алдаж, гараа ч хөдөлгөж чадахааргүй болчихоод ордноос гарсан түүнийг эмч нараас өгсүүлээд ояката Миягино буюу ёкозүна Хакүхо хүртэл цаашид барилдаад дэмий гэж зөвлөж, ятгасан ч дийлээгүй.
“Их сургууль төгсөх үеэс минь эхлээд л сумо барилдаад хэрэггүй гэж олон хүн хэлсээр ирсэн. Гэвч би сумод дэндүү их дуртай. Одоо эрэмбээ дахиад дээшлүүлэхийг маш их хүсч байна. Бөх хүн эр зоригтой, эрч хүчтэй гэдгээ дэвжээн дээр харуулах ёстой. Оносато яг үүнийг энэ башёд харууллаа шүү дээ. Би түүнтэй барилдаж үзмээр байна” хэмээн зургаан башё өнжөөд эргээд дохёд гарахаар яарч буй Энхо өгүүлжээ.
Оносатотой барилдаж үзэхийг хүснэ гэдэг нь эргээд Макүүчи зиндааны дээд хэсэгт хүртэл эрэмбээ дээшлүүлэх зорилго тавьсныг нь илтгэнэ.
.
Р.Гэгээ
Сэтгэгдэл (0)
Сэтгэгдэл бичигдээгүй байна