АКЭБОНО: БИ ДЭВЖЭЭН ДЭЭР ИЙМ ӨРӨВДӨЛТЭЙ БАЙДАЛТАЙ ГАРЧ ЧАДАХГҮЙ

Мэргэжлийн сумогийн 64 дэх ёкозүна Акэбоно Таро 54 насандаа зүрхний архаг дутагдлын улмаас таалал төгссөн тухай эмгэнэлт мэдээ түглээ.

Сүүлийн нэг сарын хугацаанд өвчин нь хүндэрсэн ч бүх хүч чадлаа шавхан амьдрахаар тэмцсээр байжээ. Хавай арлаас мэргэжлийн сумод хөл тавьж, ёкозүна цол хүртэж, сумогийн оргилд гарсан алдартай бөх хорвоогоос одсныг дөрөвдүгээр сарын 11-нд буюу өнөөдөр зарлалаа.

1988 онд Чадвик Роуэн хэмээх 18 настай хүү Хавайн их сургуулиа орхин гэнэт сумод барилдахаар эрс шийдэж, өндөр бие /2 метр 03 сантиметр/, түлхэж давшин барилдах онцгой чадварынхаа хүчээр  ёкозүна болж мандаж чадсан юм.

Ёкозүна Таканохана тэр хоёр нэг өдөр сумод орж, сумочийн замналынхаа туршид хоорондоо өрсөлдөж, биенийгээ тус бур 24 удаа давсан байдаг.

1992 оны Кюүшюү башёд озэки цолтой барилдахдаа хоёр дараалан түрүүлж, 1993 оны Хару башёд ёкозүна цолтнуудын тоог нэмж байлаа. Хоёр өвдөгний хүнд гэмтлийн улмаас барилдах хэцүү болж, гэмтсэн, эдгэсэн, эргэж барилдсан, гэмтсэн, эдгэсэн, эргэж барилдсан гэх дарааллаар тэмцэж зүтгэж явсаар 2000 оны Кшюүшюү башёд 11 дэх түрүүгээ хүртсэн. Гэвч 2001оны эхний тэмцээнд мөн гэмтлийн улмаас өнжсөнийхөө дараагаар “Би дахиад түрүүлэхийн төлөө өрсөлдөж чадахааргүй болжээ. Ёкозүна цолтой байж дэвжээн дээр ийм өрөвдөлтэй байдалтай гарч чадахгүй” хэмээн мэдэгдсэн юм.

Тэрбээр мэргэжлийн сумогийн дохёд 654 давж, 232 унаж, 181 барилдаан өнжсөн байна. 1996 оны дөрөвдүгээр сард Японы иргэн болсон байлаа.

Зодог тайлсныхаа дараагаар Сумогийн холбоонд хэсэг хугацаанд ажилласан ч 2003 оны сүүлчээр ажлаа өгч, K-1-ийн рингнээ гарч тулаан хийх болсон. Гэвч амжилттай тулаанч байж чадаагүй юм.

 “Би ийм өрөвдөлтэй байдалтайгаар дэвжээн дээр гарч чадахгүй” гэсэн түүний үг олон хүний сэтгэлийн утсыг хөндөж, мэргэжлийн сумогийн ёкозүна цолтон зөвхөн түрүүлэхийн төлөө барилдах ёстой хатуу үнэнийг дахин мэдрүүлж байлаа.