Үндэсний Статистикийн Хороо, Хэлний Бодлогын Үндэсний Зөвлөл болон Төрийн Албаны Зөвлөл хамтран төрийн албан хаагчдийн үндэсний бичгийн мэдлэг тодорхойлох хоёр дахь шатны судалгааг 4 дүгээр сарын 2-18-ны өдрүүдэд зохион байгуулж байна. Энэ судалгаанд идэвхтэй оролцож, асуулгад үнэн зөв хариулахыг Үндэсний Статистикийн Хорооноос төрийн албан хаагчдад уриалжээ.
Судалгааны дүнг 4 дүгээр сарын 29-нд нэгтгэн, 5 дугаар сард “Үндэсний бичиг үсгийн баяр”-ын үеэр нийтэд танилцуулах юм байна.
“Монгол хэлний тухай” хуульд заасны дагуу төрийн болон нутгийн өөрөө удирдах байгууллага албан хэргээ 2025 оны 1 дүгээр сарын 1-ний өдрөөс эхлэн кирилл болон үндэсний хос бичгээр хөтлөн явуулахаар бэлтгэж байна. Тиймээс “Монгол хэлний тухай” хууль, “Монгол бичгийн үндэсний хөтөлбөр III”-ийн хэрэгжилтийг дүгнэх, цаашид үндэсний бичгийн талаар төрөөс авч, хэрэгжүүлэх бодлого, дүрэм, журам, үндсэн чиглэлийг боловсруулахад шаардлагатай тоо, мэдээллийг бүрдүүлэх, төрийн албан хаагчдын үндэсний бичгийн мэдлэгийн ахицын үнэлгээг нарийвчлан тогтоох зорилгоор энэхүү судалгааг зохион байгуулж байгаа ажээ.
Сэтгэгдэл (0)
Сэтгэгдэл бичигдээгүй байна