Улаанбаатар хотод хаврын их цэвэрлэгээг 2024 оны дөрөвдүгээр сарын 1-19-ний хооронд зохион байгуулж байгаатай холбоотой Сүхбаатарын талбайг зам цэвэрлэгээний тусгай зориулалтын шүүртэй машин болон бороожуулагч машинаар цэвэрлэжээ. Мөн хөшөө дурсгал угааж арчлах ажил хийж гүйцэтгэсэн байна.
Бүх нийтийн нэгдсэн их цэвэрлэгээг 2024 оны дөрөвдүгээр сарын 11-13-ны өдрүүдэд зохион байгуулах гэнэ.
Цэвэрлэгээнд нийслэлийн дүүрэг, дүүрэг, харьяа байгууллагууд, хороод, аж ахуйн нэгж байгууллага, сууц өмчлөгчдийн холбоо, иргэд өргөнөөр оролцож гадна орчныхоо 50 метр хүртэлх зам талбай, хог хаягдлыг цэвэрлэх, барилгын хана, гадна талбайг угааж цэвэрлэн цэвэр цэмцгэр орчныг бүрдүүлэхийг Улаанбаатар хотын захирагчийн ажлын албанаас уриалжээ.
Бүх нийтийн их цэвэрлэгээний ажилд хог тээвэр болон зам талбайн үйлчилгээний байгууллагууд чиглэл тус бүрээр цэвэрлэгээ үйлчилгээ болон хог хаягдлын ачилт, тээвэрлэлтийн ажлыг эрчимжүүлэн ажиллана. Мөн СӨХ-д оршин суугчид, гэр хорооллын иргэдийн идэвх оролцоонд тулгуурлаж амьдарч буй орчноо цэвэрлэн эрүүл, аюулгүй орчин бүрдүүлэхэд гар бие оролцоход дэмжлэг үзүүлнэ.
Хаврын их цэвэрлэгээний үеэр хийгдэх ажлууд:
- Байгууллага, аж ахуйн нэгжүүд орчныхоо 50 метр хүртэлх нийтийн эзэмшлийн зам талбайг цэвэрлэх, угааж чийгшүүлэх, байгууллагынхаа хайс хашлага, автобусны буудал, нүхэн болон гүүрэн гарц, хогийн сав гадна фасад, хаяг, үүд хэсгийг угааж өнгө үзэмжийг сэргээх
- Гудамж, зам талбайн хог хаягдал, ногоон байгууламжийн шар өвс, хатсан шарилж ургамлыг цэвэрлэж ачуулах
- Айл өрх, аж ахуй нэгж байгууллагын хог хаягдлын ачилтыг эрчимжүүлэх
- Гудамж талбайн үүсмэл хогийн цэгүүдийг ачиж цэвэрлэх
- Сандал, хогийн сав, хайс хашлага, замын тэмдэг, тэмдэглэгээ, гэрэлтүүлгийн шон, хөшөө баримлыг угаах, засварлах
- Нийтийн эзэмшлийн гудамж, зам талбайд байршуулсан өнгө үзэмжгүй хаяг, мэдээллийн байгууламжуудыг буулгах, өнгө үзэмжийг сэргээж засварлах ажлуудыг тус тус хийж гүйцэтгэнэ.
Сэтгэгдэл (0)
Сэтгэгдэл бичигдээгүй байна