Озэки Киришима Б.Лхагвасүрэнгийн Мичинокү дэвжээ үүдээ барихаар болжээ. Учир нь тус дэвжээний эзэн озэки Киришима нэртэй барилдаж явсан ояката Мичинокү ирэх дөрөвдүгээр сарын 3-нд 65 нас хүрэх юм байна. 65 нас хүрээд дэвжээ удирдах эрхгүй болдог учир Мичинокү дэвжээг хаах гэнэ.
Ингэснээр тарахаар болсон Мичинокү дэвжээний бөхчүүд өөр өөр дэвжээ рүү шилжихээр боллоо. Озэки Киришима ёкозүна Какурюү М.Анандын Отоваяма дэвжээнд харъяалагдахаар болсон бол ояката Мичинокү мөн тус дэвжээнд 70 нас хүртлээ туслах оякатагаар ажиллах юм байна.
Мичинокү дэвжээ найман бөхтэй байсан. Үүнээс дөрвөн бөх нь Хару башёгийн дараагаар зодог тайлсан. Үлдсэн дөрвөн бөхийн хоёр нь Арашио дэвжээ рүү, нэг бөх нь Исэноуми рүү шилжиж байгаа ажээ.
Ёкозүна Какурюү М.Анандын хувьд өнгөрсөн жилийн 12 дугаар сард өөрийн гэсэн дэвжээгээ нээсэн. Харин одоо озэки Киришимагийн багш болж хамтран ажиллахаар боллоо.
Сэтгэгдэл (0)
Сэтгэгдэл бичигдээгүй байна