Супер од Ариана Гранде Грэммийн шагналд дахин нэр дэвшсэндээ сэтгэл нь хөдөлж, баярласан сэтгэгдлээ хуваалцжээ.
Арваннэгдүгээр сарын 16-ны даваа гарагт АНУ-ын Дуу бичлэгийн академиас 2027 оны Грэммийн шагналд нэр дэвшигчдийг зарласны дараахан дуучин бүсгүй Instagram хуудсандаа сэтгэл догдлуулсан зурвас нийтэлсэн байна.
Тэрбээр удахгүй болох Грэммийн шагнал гардуулах ёслолын дөрвөн төрөлд нэр дэвшжээ. Үүнд түүний хамгийн сүүлд гаргасан Petal цомог болон 2025 оны кино урлагийн томоохон бүтээл Wicked: For Good мюзикл кинонд зориулан дуулсан бүтээлүүд багтсан байна.
Гранде "Сайн байцгаана уу, өдрийн мэнд! Би уйлж байна аа!!!!!!!!!!! Petal!!!!!!!!!!! Сэтгэл минь үнэхээр их хөдөлж, яг одоо юу хэлэхээ ч мэдэхгүй байна. Гэхдээ одоохондоо ердөө л... миний хайртай Petal цомог болон Hate That I Made You Love Me дууг ийнхүү үнэлж, хүлээн зөвшөөрсөн Грэммийн шагналын хамт олонд маш их, үнэхээр их баярлалаа...” хэмээн эхлүүлжээ.
Ариана Гранде дараах дөрвөн төрөлд нэр дэвшсэн байна.
Оны шилдэг дуу (Song of the Year) — Hate That I Made You Love Me
Шилдэг дууны видео (Best Music Video) — Hate That I Made You Love Me
Шилдэг поп дууны цомог (Best Pop Vocal Album) — Petal
Шилдэг поп хослол буюу хамтлагийн тоглолт (Best Pop Duo/Group Performance) — Синтия Эривотой хамтран дуулсан Wicked: For Good киноны For Good дуу.
Hate That I Made You Love Me дуу өнгөрсөн тавдугаар сард гарч, Billboard Hot 100 жагсаалтын тэргүүн байрт бичигдсэн юм. Уг дуу нь долдугаар сард худалдаанд гарч, Billboard 200 жагсаалтыг тэргүүлсэн Petal цомгийн гол сингл болжээ.
Гранде цааш нь “Би энэ уран бүтээлээрээ үнэхээр, үгээр илэрхийлэхийн аргагүй их бахархаж байна. Ийм өндөр үнэлгээ хүртэнэ гэдэг миний хувьд нэр төрийн хэрэг юм” хэмээн бичсэн байна.
Үүний дараа тэрбээр өөртэй нь хамтран ажилласан хөгжмийн продюсер Илья Салманзаде болон Макс Мартин нарт талархал илэрхийлжээ.
“Та хоёр бол үнэхээр гайхалтай хүмүүс. Өнгөрсөн 12 жилийн турш та хоёртой хамтран уран бүтээл туурвиж, олон шинэ чиглэлд өсөж хөгжиж, хамтдаа шинэ навч соёолуулж ирсэн хором мөч бүр надад аз жаргал бэлэглэсэн. Уран бүтээлчийн хувьд шинийг эрэлхийлэх хүсэл тэмүүллийг минь дэмжиж, дуу зохиогч, продюсерийн хувьд намайг үргэлж урамшуулж, итгэл хүлээлгэдэгт баярлалаа. Та хоёр бүх талаараа хамгийн шилдэг нь” гэсэн байна.
Сэтгэгдэл (0)
Сэтгэгдэл бичигдээгүй байна