Эх, хүүхдийн эрүүл мэндийн тусламж үйлчилгээний чанар, ургийн эрт илрүүлэг, оношилгооны боломжийг нэмэгдүүлэх зорилгоор Эх, хүүхдийн эрүүл мэндийн үндэсний төвд НИПТ буюу инвазив бус жирэмсний үеийн скрининг шинжилгээг албан ёсоор нэвтрүүллээ.
НИПТ шинжилгээ нь эхийн цусанд агуулагдах ургийн чөлөөт ДНХ-ийг шинжлэх замаар урагт зонхилон тохиолддог 21, 18, 13 дугаар хромосомын илүүдэл болон бэлгийн Х, Ү хромосомын өөрчлөлтийн эрсдэлийг жирэмсний эрт үед илрүүлэх орчин үеийн молекул генетикийн шинжилгээ юм.
Тус шинжилгээ нь эх, урагт эрсдэл багатай, инвазив бус арга бөгөөд дээрх хромосомын өөрчлөлтийг илрүүлэхэд 99 хүртэлх хувийн мэдрэг чанартай. Ингэснээр жирэмсний хяналтын явцад ургийн эрсдэлийг эрт үнэлж, шаардлагатай тохиолдолд нэмэлт оношилгоо, генетикийн зөвлөгөө болон цаашдын эмнэлзүйн тусламж үйлчилгээг цаг алдалгүй төлөвлөх боломж нэмэгдэж байна.
НИПТ нь оношилгооны шинжилгээ бус, эрсдэлийг үнэлэх скрининг шинжилгээ бөгөөд өндөр эрсдэлтэй хариу гарсан тохиолдолд эмчийн зөвлөгөөний дагуу баталгаажуулах оношилгоо хийх шаардлагатай.
ЭХЭМҮТ-ийн Анагаахын удамзүйн лабораторийн хамт олон дараа үеийн секвенсийн технологид суурилсан уг шинжилгээг хийх сургалтад амжилттай хамрагдаж, гадаад хяналтын дөрвөн удаагийн үнэлгээг бүрэн амжилттай давснаар молекул генетикийн технологид суурилсан жирэмсний үеийн скрининг шинжилгээг хийх олон улсын гэрчилгээгээ гардан авлаа.
Ийнхүү ургийн зарим хромосомын өөрчлөлтийн эрсдэлийг эхийн цуснаас эрт илрүүлэх боломжийг дотооддоо бүрдүүлж, эх, ургийн эрүүл мэндийн тусламж үйлчилгээнд орчин үеийн молекул генетикийн технологийг нэвтрүүлэн, эрт илрүүлэг болон генетикийн тусламж үйлчилгээний чадавхыг нэмэгдүүлж байна.
Сэтгэгдэл (0)
Сэтгэгдэл бичигдээгүй байна