КОП17: НОГООН БҮСИЙН НЭЭЛТИЙН АРГА ХЭМЖЭЭ БОЛЛОО

Цөлжилттэй тэмцэх тухай НҮБ-ын конвенцын Талуудын 17 дугаар бага (КОП17) -ын Ногоон бүсийн нээлтийн үйл ажиллагаа өнөөдөр /2026.08.18/ боллоо.

Нээлтийн ёслолд Байгаль орчин, уур амьсгалын өөрчлөлтийн сайд, COP17-ыг зохион байгуулах Үндэсний хорооны дарга Ц.Сандаг-Очир, Цөлжилттэй тэмцэх тухай Нэгдсэн Үндэстний Байгууллагын конвенцын Гүйцэтгэх нарийн бичгийн дарга Ясмин Фуад, Нийслэлийн Засаг дарга Б.Пүрэвдагва болон бусад хүмүүс оролцлоо. 

Монгол Улсын иргэн хэн боловч иргэний үнэмлэхээ үзүүлээд нэвтрэх боломжтой Ногоон бүсэд 480  зэрэгцээ арга хэмжээ зохион байгуулагдана.  

Тус бүсэд төрийн албаныхан, эрдэмтэд, мэргэжилтнүүд, хувийн хэвшлийнхэн, иргэний нийгмийн байгууллагынхан олон нийттэй цөлжилттэй тэмцэх асуудлын ач холбогдлыг илүү ойлгуулах, мэдлэг мэдээллээ хуваалцаж байна. Мөн өдөр бүр соёл урлагийн арга хэмжээ болж буй бөгөөд манай урлагийн томоохон байгууллагууд ажиллаж байгаа юм. Нэг л жишээ дурдахад Ногоон бүсэд 6 киноны нээлт болох бөгөөд үүний 3 нь олон улсын, 3 нь дотоодын бүтээл байна. Түүнчлэн орон орны хоол ч амтлах боломжтой юм. 

КОП17 Бага хурал өчигдөр эхэлснээс хойш Ногоон бүсийг 2000 гаруй хүн үзэж сонирхсон гэх албан бус мэдээлэл байгаа юм. 

КОП гэдэг бол Талуудын бага хурал гэсэн утгатай үг бөгөөд ер нь НҮБ-ын Конвенцид нэгдэж орсон талууд хуралдаж, шийдвэрээ гаргадаг. 

1992 оноос үүсэлтэй 3 төрлийн КОП хурал байдаг. Уур амьсгалын өөрчлөлтийн асуудлаарх хурал нь жил бүр, Цөлжилтийн болон Биологийн олон янз байдлын асуудлаарх хурлууд нь 2 жилд нэг удаа болдог. 

Цөлжилтийн асуудлаарх эхний 15 удаагийн КОП буюу Талуудын бага хурал зөвхөн цэнхэр бүсэд хуралдаж, түүнд нэгдсэн 197 орны төлөөлөгчид хэлэлцээр хийж асуудлаа шийдвэрлэдэг байсан. Саудын Арабад 2 жилийн өмнө болсон КОП16-ын үеэр Ногоон бүсийг анх удаа байгуулсан. Зохион байгуулагч орны болон бусад иргэдийн чөлөөтэй үзэж, сонирхох боломжийг хангах зорилгоор үүнийг байгуулсан юм. 

Монгол Улс эх орондоо КОП17 хурлыг зохион байгуулахдаа Ногоон бүс байгуулах хүсэлтээ НҮБ-ын Конвенцын талд уламжилж, зөвшөөрөл авсан. Ингэснээр Монгол Улс нь Конвенцын түүхэнд Ногоон бүс байгуулсан 2 дахь улс болсон юм. 

Ногоон бүсэд төр, хувийн хэвшил, иргэний нийгэм, шинжлэх ухааны 60 гаруй байгууллага өөрсдийн үйл ажиллагаа танилцуулж байгаа.

Хурлын 12 өдрийн туршид 480 зэрэгцээ арга хэмжээ зохион байгуулагдахаас гадна кино үзвэр, соёлын биет болон биет бус өвийн үзэсгэлэн зэрэг олон сонирхолтой арга хэмжээ болно. 

Ногоон бүс нь зөвхөн арга хэмжээ, үзэсгэлэнгийн талбай биш гэдгийг нотолсон нэгэн сайхан үйл явдал "Ногоон бүс"-ийн нээлтийн үеэр болсон. 

Энэ нь "Эх байгалиа сэргээж Итгэл найдвараа бадраая" гэсэн UNCCD COP17 хурлын албан ёсны уриаг Монгол Улсын "Ногоон бүс"-ийн албан ёсны уриа болгож байгаагаа Цөлжилттэй тэмцэх тухай НҮБ-ын конвенцын Харилцаа холбоо, гадаад харилцаа, түншлэлийн хэлтсийн дарга Ксеня Сканлон нээлтийн үеэр мэдэгдсэн явдал байв. 

Ер нь цаашдаа КОП хурлуудад Ногоон бүс байнга ажиллуулах талаар ч яригдаж байгаа юм. 

Ногоон бүсэд болох арга хэмжээнүүдтэй дараах линкээр танилцана уу: https://heyzine.com/flip-book/5b49f38197.html

Та хөтөлбөртэй танилцаж, сонирхсон арга хэмжээндээ оролцоорой.