КОП17: МАНАЙ ТАЛ ХЭЭРИЙН ТӨЛӨВЛӨГӨӨ БА 4 ГОЛ ТӨСӨЛ

Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хурал (COP17) Улаанбаатар хотноо өнөөдөр /2026.08.17/ эхэллээ. 

Дэлхий нийтэд тулгамдаад буй цөлжилт, газрын доройтол, гангийн асуудлаар хэлэлцэхээр Конвенцын гишүүн 197 орны 12,000 гаруй төлөөлөгч ирээд байна. 

Энэ бага хуралд манай улсын дэвшүүлэх гол санаачилга, танилцуулах төсөл юу вэ? 

КОП17-ын үеэр найман санаачилга яригдахын гурвыг нь манай улс дэвшүүлжээ.

Тал хээрийн төлөвлөгөө гэдэг “малгайн” дор манай улс стратегийн 3 том санаачилга дэвшүүлж байна. Эдгээр нь

• -Бэлчээрийн тэргүүлэх санаачилга
• -Ус ба газрын нэгдсэн менежментийн санаачилга
• -Байгальд суурилсан шийдэл бухий тогтвортой дэд бүтцийн санаачилга юм.

Засгийн газраас КОП17-ын үеэр дараах 4 төслийг олон улсад санал болгож, санхүүжилт татахаар шийдээд байгаа аж.

1.Хиймэл оюунд суурилсан, эрчим хүчний хэмнэлттэй “Ногоон дата” төв

15МВт-ын нарны станц, BESS хосолсон сэргээгдэх эрчим хүчний эх үүсвэртэй, 1.25-1.35 PUE үзүүлэлт бүхий байгалийн хөргөлттэй дата төв байгуулж, үндэсний өгөгдлийн бүрэн эрхт байдал, дижитал шилжилтийг хангана.

2. “Орхон-Онги” ус дамжуулах шугам хоолой төсөл /Нэгдүгээр үе шат: Онги-Цагаан бургастай төсөл/

65 сая куб.м багтаамжтай усан сан, 236 км газар доор шугам, 0.5MBт-ын Усан цахилгаан станц байгуулж, Улаан нуурын экосистемийг сэргээн говийн бүсийг цэвэр усаар хангана.

3. Бэлчээрийн сайн туршлагыг нүүрстөрөгчийн зах зээлд холбох төсөл

10 жилийн хугацаанд бэлчээрийн нүүрстөрөгчийн дижитал MRV тогтолцоог бүрдүүлж, нүүрстөрөгчийн зах зээлээр дамжуулан тогтвортой санхүүжилтийн механизмыг хөгжүүлж, малчдын тогтвортой орлогыг нэмэгдүүлнэ.

4.Уур амьсгалын өөрчлөлтөд тэсвэртэй гандуу бүс нутгийн Евразийн төв

Монгол Улсад төвтэй, Цөлжилттэй тэмцэх тухай НҮБ-ын конвенцийн дэмжлэгтэй хараат бус байгууллага бөгөөд Талуудын 17 дугаар бага хурлын өвийн хүрээнд хэрэгжих санаачилгуудыг нэгдсэн зохицуулалтаар ханган ажиллана.

Эдгээр тэргүүлэх төслүүд нь уул уурхай, хөдөө аж ахуйн бүс нутгийг цэвэр усаар хангаж, цөлжилтийг сааруулахын зэрэгцээ дэвшилтэт ногоон технологид суурилсан уур амьсгалын өөрчлөлтөд дасан зохиох чадварыг бэхжүүлэхэд чиглэж байгаа бөгөөд эхний 3 төслийн нийт төсөвт өртөг нь 301.5 сая ам.доллар байхаар тооцож байгаа юм.