МОНГОЛ, ЯПОНЫ САНХҮҮГИЙН ЗОХИЦУУЛАГЧ БАЙГУУЛЛАГУУД ХАМТЫН АЖИЛЛАГААГАА ШИНЭ ТҮВШИНД ХҮРГЭНЭ

Санхүүгийн зохицуулах хорооны дарга Т.Жамбаажамц Япон Улсын санхүүгийн зохицуулагч байгууллагын удирдлагуудтай уулзалт хийж, хоёр байгууллагын хамтын ажиллагааны үр дүн, цаашдын хамтын ажиллагааны талаар санал солилцжээ.

Уулзалтад тус байгууллагын дарга Ито Ютака, Олон улсын асуудал эрхэлсэн дэд дарга Озаки Юү, Монгол Улсаас Япон Улсад суугаа Онц бөгөөд Бүрэн эрхт Элчин сайд Б.Баярсайхан болон албаны бусад хүмүүс оролцсон байна. 

Т.Жамбаажамц дарга уулзалтын эхэнд Монгол Улсын санхүүгийн салбарын хүний нөөцийг чадавхжуулах, туршлага судлуулах сургалт, хөтөлбөрүүдийг тогтмол хэрэгжүүлж ирсэнд талархал илэрхийллээ. Үүний дараа Монгол Улсын санхүүгийн салбарыг олон тулгуурт, хүртээмжтэй, ухаалаг, ногоон санхүүгийн тогтолцоонд шилжүүлэх хүрээнд хэрэгжүүлж буй бодлого, арга хэмжээнийхээ талаар танилцуулсан юм.

Салбарын хэмжээ дотоодын нийт бүтээгдэхүүний 26.8 хувийг бүрдүүлж байгаа бөгөөд сүүлийн жилүүдэд хөрөнгийн зах зээлийн хөгжил эрчимжиж, зах зээлийн үнэлгээ 13.9 их наяд төгрөгт, үнэт цаасны арилжааны хэмжээ 1.3 их наяд төгрөгт хүрснийг онцлов. Үүний зэрэгцээ хадгаламжийн сертификат, тогтвортой байдлын бонд зэрэг шинэ бүтээгдэхүүн, үйлчилгээг зах зээлд нэвтрүүлж, виртуал хөрөнгийн үйлчилгээ болон сэндбоксын зохицуулалтыг хэрэгжүүлж, блокчэйн суурьтай арилжааны системийг туршин нэвтрүүлснээр санхүүгийн үйлчилгээний хүртээмж, шуурхай байдал нэмэгдэж байгааг танилцууллаа. Түүнчлэн JICA-тай хамтран хэрэгжүүлсэн “Монгол Улсын хөрөнгийн зах зээлийн чадавхыг бэхжүүлэх” хоёр үе шаттай төслийн үр дүнг танилцууллаа. Төслийн хүрээнд эрсдэлд суурилсан хяналт шалгалтын тогтолцоог нэвтрүүлэх, IPO гаргах компаниудад зөвлөгөө өгөх, олон нийтийн санхүүгийн боловсролыг дээшлүүлэх чиглэлээр үр дүнтэй ажил хэрэгжүүлсэн. Мөн биржийн бус зах зээлийн эрх зүйн орчныг бүрдүүлж, компанийн хаалттай бондын зохицуулалтыг боловсронгуй болгосноор үнэт цаас гаргах үйл ажиллагааны хугацаа, зардлыг бууруулж, мэргэжлийн хөрөнгө оруулагчдад чиглэсэн зах зээлийн хөгжлийн суурийг бүрдүүлснийг онцоллоо.

Уулзалтын төгсгөлд талууд Монгол Улсын санхүүгийн зах зээлийг тогтвортой, хүртээмжтэй байдлаар хөгжүүлэх, үнэт цаасны санхүүжилтийн тогтолцоог нэвтрүүлэх, урт хугацааны санхүүжилтийн эх үүсвэрийг нэмэгдүүлэх, хяналтын тогтолцоог олон улсын жишигт нийцүүлэхийн зэрэгцээ аж ахуйн нэгжүүдийн хөрөнгийн зах зээлээс санхүүжилт татах боломжийг нэмэгдүүлэх, хөрөнгө оруулагчдын итгэлийг бэхжүүлэх, компанийн бондын зах зээлийг хөгжүүлэх хүрээнд бондын батлан даалтын санг нэвтрүүлэх чиглэлд хамтын ажиллагаагаа өргөжүүлэхээр санал нэгдсэн юм.

Японы санхүүгийн зохицуулагч байгууллага нь банк, даатгал, хөрөнгийн зах зээлийн үйл ажиллагааг зохицуулж, санхүүгийн системийн тогтвортой байдлыг хангах үүрэгтэй төрийн байгууллага юм.