Хууль зүй, дотоод хэргийн сайд С.Амарсайхан салбарын цахимжилтыг эрчимжүүлэх чиглэлээр Цахим хөгжил, инновац, харилцаа холбооны сайд Ч.Номин болон холбогдох албан тушаалтнуудыг өчигдөр /2026.04.27/ хүлээн авч уулзжээ.
Уулзалтаар хууль зүй, дотоод хэргийн салбарын үйл ажиллагааг үе шаттайгаар цахимжуулах хамтарсан ажлын хэсэг байгуулах, хууль зүй, дотоод хэргийн салбарын байгууллагуудын уялдаа холбоог сайжруулж, өгөгдөлд суурилсан нэгдсэн нэг цахим санг хөгжүүлэх асуудлаар ярилцаж, харилцан санал солилцсон байна.
Хууль зүй, дотоод хэргийн салбар хуулийн хүрээнд төрийн болон хувийн нууцаас бусад бүх мэдээллийг нээлттэй болгож, хавтас хэргүүдийг цахимжуулах, хэн нэгний өгсөн өргөдөл гомдол аль шатандаа явж байгааг, хэн хариуцаж байгаа зэрэг бүх процессыг цахимаар хянадаг, байгууллагууд цахимаар мэдээллээ солилцдог болгох бодлого баримталж байна.
Хэн нэгэн албан тушаалтны үзэмжээр бус систем ажилладаг тогтолцоо бүрдсэнээр төрийн үйлчилгээг хүнд сурталгүй, түргэн шуурхай, хүртээмжтэй хүргэх, иргэдийн цаг хугацаа, зардал хэмнэх нөхцөлийг бүрдүүлэх юм.
Цахим хөгжим, инновац, харилцаа холбооны сайд Ч.Номин хууль зүй, дотоод хэргийн салбарыг цахим нэгдсэн сантай болгоход онцгой анхаарч, хамтарч ажиллана гэдгээ хэлжээ.
Хамтарсан ажлын хэсэг хамгийн эхэнд хууль зүй, дотоод хэргийн салбарын цахимжилт ямар шатандаа явж байгааг үнэлж дүгнэх аудитын шалгалтыг явуулна, цаашид төлөвлөгөө боловсруулж, цахимжилтыг хамгийн богино хугацаанд хийхээр төлөвлөж байна.
Сэтгэгдэл (0)
Сэтгэгдэл бичигдээгүй байна