УИХ-ын гишүүн, Засгийн газрын гишүүн, Хууль зүй, дотоод хэргийн сайд С.Амарсайхан харьяа агентлаг, байгууллагуудын удирдлагуудыг хүлээн авч уулзлаа. Уулзалтын үеэр ХЗДХ-ийн сайд С.Амарсайхан хэлсэн үгэндээ “Хууль зүй, дотоод хэргийн салбар бол Монгол төрийн оршин тогтохуйн үндэс болсон чухал салбар. Энэ салбарыг цогцоор нь харж, хууль хэрэгждэг, хууль ард иргэдээ хамгаалдаг, хууль хэрэгжүүлэгчээ ч хамгаалдаг, хүний эрхийг дээдэлсэн, шударга, ил тод нээлттэй тогтолцоотой байх учиртайг” онцлов.
С.Амарсайхан сайд харьяа агентлаг, байгууллагуудын удирдлагуудад дараах чиглэлээр үүрэг өглөө.
- Цагдаагийн байгууллагад: Хар тамхи, мансууруулах бодисын хэрэг нэмэгдэж байгаатай холбоотойгоор нийлүүлэлтийн сүлжээг илрүүлэх, таслан зогсоох, устгал хийх, урьдчилан сэргийлэх ажлыг эрчимжүүлэх үүрэг өгсөн. Мөн сошиал орчин, аппликейшн, хэвлэл мэдээллийн сувгуудад хяналт тавьж, залуусыг хамгаалах арга хэмжээ авахыг чиглэл болголоо. Цагдаагийн алба хаагчид хар тамхитай холбоотой гэх хардлагыг ил тод шалгаж, буруутай бол хариуцлага тооцох, буруугүй бол нэр хүндийг хамгаалах хэрэгтэйг онцоллоо.
- Шүүхийн шийдвэр гүйцэтгэх байгууллагад: Ачаалал хэт төвлөрсөнөөс үйлчилгээ удааширч, иргэд бухимдаж байгааг шийдвэрлэх зорилгоор нэг цэгийн үйлчилгээний бүх төвд алба хаагч ажиллуулах, мэдээллийг өргөн түгээх үүрэг өгсөн. Мөн нийслэлийн шийдвэр гүйцэтгэх нэгжүүдийг 9 дүүрэгт хуваарилан байршуулах, хүний нөөц, төсвийг шийдэхийг чиглэл болгосон. Иргэдийн өргөдөл, гомдол болон төлбөртэй холбоотой мэдээллийг ил тод болгох, хорих ангиудад хүний эрхийн зөрчил, дарамт шахалт гаргахгүй байхыг онцгой анхааруулсан.
- Хил хамгаалах байгууллагад: Боомтын хяналтыг чангатгах, зорчигч тээврийн шалгалтыг сайжруулах, хилийн заставуудад гарч болзошгүй сахилгын зөрчил, хүчирхийллээс урьдчилан сэргийлэх үүрэг өгсөн. Алслагдсан анги нэгжүүдэд дотоод хяналт, камерын хяналтыг сайжруулж, бэлгийн болон бусад төрлийн хүчирхийллээс сэргийлэхийг чиглэл болголоо. Мөн цэргүүдийг зөвшөөрөгдөөгүй ажилд дайчлахгүй байх, алба хаах сонирхлыг нэмэгдүүлэх арга хэмжээ хэрэгжүүлэхийг анхааруулав..
- Дотоодын цэрэгт: Дүрмийн бус харилцааг таслан зогсоох, алба хаагчдын орчин нөхцөлийг сайжруулах, зөвшөөрөгдөөгүй ажилд дайчлахгүй байхыг онцолсон. Мөн гомдол, хүсэлт гаргах нээлттэй, нууцлалтай тогтолцоог бүрдүүлж, дарамт шахалтгүй орчин бий болгохыг чиглэл болгов.
Түүнчлэн салбарын бүх байгууллагад сахилга хариуцлага, ил тод байдал, хүний эрхийг эрхэмлэсэн, үйлчилгээний хүртээмжийг сайжруулах, дотоод хяналтыг чангатгах чиглэлээр тодорхой үүрэг даалгавар өгсөн юм.
Сэтгэгдэл (0)
Сэтгэгдэл бичигдээгүй байна