Хууль зүй, дотоод хэргийн яамнаас Улсын бүртгэлийн ерөнхий газрын даргын А/1172 дугаар тушаалыг хүчингүй болгосноор иргэд үл хөдлөх эд хөрөнгийн гэрчилгээгээ хаяж үрэгдүүлсэн тохиолдолд дахин авах шат дамжлагыг бууруулжээ.
Улсын бүртгэлийн ерөнхий газрын даргын 2020 онд гаргасан дээрх тушаалын дагуу хаяж, үрэгдүүлсэн үл хөдлөх эд хөрөнгийн гэрчилгээг дахин авахад тухай бүр хяналтын улсын байцаагчийн дүгнэлт гарснаар улсын бүртгэл хөтлөх процесс нь ихээхэн хугацаа шаарддаг байжээ.
2020 оноос хойш иргэн, хуулийн этгээдэд 12,033 удаагийн үрэгдүүлсэн гэрчилгээг дахин олгох үйлчилгээ үзүүлсэн байна. Энэ нь 12,033 удаагийн хяналтын улсын байцаагчийн дүгнэлт гарч байсан гэсэн үг. Цаашид хяналтын улсын байцаагчийн дүгнэлтийг хүлээж хугацаа алдахгүй болж байна.
Эд хөрөнгийн эрхийн улсын бүртгэлийн гэрчилгээг хаяж, үрэгдүүлсэн тохиолдолд хүчингүйд тооцох асуудлыг зохицуулж байсан дээрх тушаалыг холбогдох хууль, журамд нийцүүлэн хүчингүй болгож, улсын ерөнхий байцаагчийн байнгын шинжтэй дүгнэлт гаргажээ. Цаашид эд хөрөнгийн эрхийн улсын бүртгэлийн гэрчилгээг хаяж, үрэгдүүлсэн тохиолдолд улсын ерөнхий байцаагчийн байнгын шинжтэй нэг удаагийн дүгнэлтийг үндэслэх юм.
Иргэдэд үзүүлэх төрийн үйлчилгээг илүү шуурхай, хүртээмжтэй болгох зорилгоор гэрчилгээ үрэгдүүлсэн тохиолдолд гэрчилгээг дахин олгох хугацааг богиносгохоор холбогдох хууль тогтоомжид өөрчлөлт оруулах саналыг Хууль зүй, дотоод хэргийн яам боловсруулж байгаа аж.
Сэтгэгдэл (0)
Сэтгэгдэл бичигдээгүй байна