Аж үйлдвэр, эрдэс баялгийн сайд Г.Дамдинням Засгийн газрын өнөөдрийн /2026.03.11/ хуралдаанаас гарсан шийдвэртэй холбогдуулан мэдээлэл өглөө.
Г.Дамдинням "Монгол Улсын Засгийн Газрын хуралдаанаар удаан хугацаанд яригдсан Монгол Улсад агаарын хөлгийн түлш нийлүүлэх Монгол Улс ОХУ-ын хоорондын хэлэлцээрийн нэмэлт өөрчлөлт болон үндсэн хэлэлцээрийг УИХ-ын холбогдох байнгын хороодоор зөвшилцөж эцэслэн батлах үйл ажиллагааг эхлүүлэх шийдвэрийг гаргалаа.
Та бүхний мэдэж байгаагаар 2025 оны хавар энэхүү хэлэлцээрийн асуудал УИХ-аар орж, гишүүдийн тодорхой шаардлагын улмаас үйл ажиллагаа зогссон. Энэ хэлэлцээрийг шинээр манай Засгийн газар ОХУ-тай тасралтгүй үргэлжлүүлж нэлээн хөдөлмөр хүч зарцуулсны үр дүнд Монгол Улсын байр суурь, УИХ-ын гишүүдийн дэвшүүлж байсан асуудлуудыг Монгол Улсынхаа томьёоллоор хэлэлцээрт оруулж чадсан үр дүнтэйгээр энэхүү хэлэлцээрийг хийхээр болж байна.
Тун удахгүй Засгийн газраас хэлэлцээрийг хийх үйл ажиллагааг эхлүүлнэ. Үндсэндээ, УИХ-ын холбогдох байнгын хороодоор зөвшилцөж гарын үсэг зурах эрх авна. Үүний дараа эргэн УИХ-аар соёрхон батлуулах ийм ажил явагдана.
Хэлэлцээрийн хамгийн том үр дүн нь ОХУ-аас Монгол Улсад нефтийн бүтээгдэхүүнийг тасралтгүй, тогтвортой нийлүүлэх үүргийг хүлээх хоёр гэрээний нэг чухал хэлэлцээр байгаа юм. Хэлэлцээр хүчин төгөлдөр болсноор хоёр дахь хэлэлцээр буюу Монгол Улсад нефтийн бүтээгдэхүүнийг тогтвортой нийлүүлэх үүргээ хууль ёсоор биелүүлэх хариуцлагатай болох үр дүнтэй гэрээ юм. Энэ ажил удахгүй эхлэхээр боллоо." гэв.
Сэтгэгдэл (0)
Сэтгэгдэл бичигдээгүй байна