“Парисын хэлэлцээрийн 6 дугаар зүйл ба Хамтарсан кредит олгох механизм (JCM)-ын төслийн хүрээнд Монгол–Японы талуудын бизнесийн хамтын ажиллагааг дэмжих форум” 2026 оны 2 дугаар сарын 27-ны өдөр болжээ.
Форумыг Япон Улсын Байгаль орчны яам, Монгол Улсын Байгаль орчин, уур амьсгалын өөрчлөлтийн яам, Эрчим хүчний яам, Япон Улсын Элчин сайдын яам болон холбогдох байгууллагууд хамтран зохион байгуулж, 230 гаруй төр, хувийн хэвшлийн төлөөлөгчид оролцсон байна.
Форумын хүрээнд оролцогчдод Парисын хэлэлцээрийн 6 дугаар зүйлийн хэрэгжилтийн талаарх практик ойлголтыг нэмэгдүүлэх, Монгол Улсад ХКОМ-ын төслүүдийг боловсруулах, хэрэгжүүлэх үйл явцыг дэмжих, ХКОМ-ын хоёр талт хамтын ажиллагаа, төслийн мөчлөг, кредит олголтын журам, аргачлал зэрэг сүүлийн үеийн мэдээллийг танилцуулжээ.
Мөн сэргээгдэх эрчим хүч, эрчим хүчний үр ашиг, хог хаягдлыг эрчим хүч болгон ашиглах, мал аж ахуй, ойн нөхөн сэргээлт, тээвэр, барилга, үйлдвэрлэлийн процесс зэрэг салбарт хэрэгжих боломжтой тодорхой төслүүдийг Монгол, Японы компаниуд танилцуулах бизнесийн ганцаарчилсан уулзалтуудыг зохион байгуулсан байна.
Форумын нээлтийн үеэр Хамтарсан кредит олгох механизмын Монгол талын хорооны дарга бөгөөд тус яамны Бодлого төлөвлөлтийн газрын дарга Б.Бат-Өлзий Монгол Улс Үндэсний тодорхойлсон хувь нэмэр (NDC 3.0)-ийн зорилтыг хэрэгжүүлэхэд JCM-ын төслүүд бодит хувь нэмэр оруулах боломжтойг онцлон тэмдэглэжээ.
Энэхүү форум нь Монгол, Японы төр, хувийн хэвшлийн түншлэлийг бэхжүүлж, Парисын хэлэлцээрийн 6 дугаар зүйлийн хэрэгжилтийг бодитоор ахиулах, Монгол Улсын ногоон шилжилтийг дэмжих чухал арга хэмжээ болсон байна.
Сэтгэгдэл (0)
Сэтгэгдэл бичигдээгүй байна