СOP17-ЫН БЭЛТГЭЛ АЖЛЫН ХҮРЭЭНД ХИЙСЭН ЗАРИМ ОНЦЛОХ ЗҮЙЛС /2026.02.23-03.01/

НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.

COP17-ын бэлтгэл ажилтай холбоотой өнгөрсөн долоо хоногт /2026.02.23-2026.03.01/ өрнөсөн үйл явдлаас заримыг нь тоймлон хүргэж байна.

COP17-ЫН ХӨХ БҮС ДЭХ ТҮР УГСРАХ БАРИЛГА БАЙГУУЛАМЖ БАРИХ КОМПАНИ ШАЛГАРАВ

Цөлжилттэй тэмцэх тухай конвенцын талуудын 17 дугаар бага хурал (UNCCD COP17)-ыг зохион байгуулах түр байгууламжийг барих болон зочлох үйлчилгээний чиглэлээрх зарим ажлыг нийслэлээс хариуцан зохион байгуулж буй. Энэ хүрээнд уг хурлын хөх бүс дэх түр угсрах барилга байгууламж барих олон улсын сонгон шалгаруулалт зарласан. Барилга байгууламжийг барих ерөнхий гүйцэтгэгчээр Франц улсад төвтэй GL Events компани шалгарлаа. Тус  компани нь 2011-2024 онуудад нийт 11 COP арга хэмжээнд үндсэн болон туслах гүйцэтгэгчээр ажиллаж байсан туршлагатай юм.

НИЙСЛЭЛИЙН ТӨСӨВТ COP-ТОЙ ХОЛБООТОЙ 70.1 ТЭРБУМ ТӨГРӨГ ТУСГАЖЭЭ

Нийслэлийн 2026 оны төсвийн урсгал зардлыг 71.6 тэрбум төгрөгөөр нэмэгдүүлэхээр тусгасан байна. Үүнд “КОП-17” үйл ажиллагаатай холбоотойгоор хурлын байр байгууламж, үйлчилгээг түрээсийн хэлбэрээр зохион байгуулахад холбогдох зардалд 70.1 тэрбум төгрөг тусгахаар тооцсон байна.

ОЛОН УЛСЫН ГАЗРЫН САНААЧИЛГЫН ТАЙЛАН ГАРЛАА

Цөлжилттэй тэмцэх тухай НҮБ-ын конвенцын дэргэдэх G20 Олон Улсын Газрын Санаачилгын (G20 GLI) 2025 оны тайлан гарлаа.

Энэхүү санаачилга нь “Их 20”-ийн орнуудын дэмжлэгтэйгээр 2040 он гэхэд газрын доройтлыг 50 хувиар бууруулах зорилготой бөгөөд тайланд дэлхий даяар газрын нөхөн сэргээлтийг эрчимжүүлэх бодлого, түншлэл, залуучуудын оролцоо өсөн нэмэгдэж буйг онцолжээ.

2026 оны 8 дугаар сарын 17–28-ны өдрүүдэд Улаанбаатар хотноо зохион байгуулагдах COP17 Талуудын бага хурлыг угтан энэхүү тайлан нь газрын доройтол, нөхөн сэргээлтийн чиглэлд гарч буй дэлхийн ахиц дэвшил, хамтын ажиллагааны чиг хандлагыг улам тодотгож байна.

"ХУВАНЦАРГҮЙ COP17” УРИАЛГЫГ ТӨР, ХУВИЙН ХЭВШИЛ ХАМТРАН ХЭРЭГЖҮҮЛЖ ЭХЛЭВ

Нэг удаагийн хуванцар сав байгальд бүрэн задран шингэхэд дунджаар 450 жил шаардлагатай байдаг. Энэхүү ноцтой асуудалтай уялдуулан Байгаль орчин, уур амьсгалын өөрчлөлтийн яам болон НҮБ-ын Цөлжилттэй тэмцэх тухай конвенц-ын Талуудын 17 дугаар бага хурал — COP17-ыг “Хуванцаргүй” зохион байгуулах уриалгыг дэвшүүлж, хувийн хэвшлийн байгууллагуудтай хамтран хэрэгжүүлж эхэллээ.

“Хуванцаргүй COP17” санаачилга нь олон улсын зочид, төлөөлөгчдөд Монгол Улс байгаль орчны хариуцлагыг бодит ажил болгон хэрэгжүүлж буйг харуулах бодит алхам болж байна. Төр, хувийн хэвшлийн энэхүү хамтын ажиллагаа нь зөвхөн нэг арга хэмжээгээр хязгаарлагдахгүй, цаашид салбарын хэмжээнд тогтвортой жишиг тогтоох эхлэл болохоороо онцлог юм.

ШИЙДЭЛ ЭНГИЙН:

• Хогоо ангилж хэвшье.

• Нэг удаагийн хуванцраас татгалзъя.

• Хуванцрын хэрэглээг багасгая.