УИХ-ын дарга Н.Учрал иргэдээс дэвшүүлсэн асуудлыг багцлан Засгийн газрын ээлжит хуралдаанаар хэлэлцүүлсний үр дүнд тодорхой арга хэмжээ авахаар болсон талаар өөрийн цахим хаягтаа бичжээ.
Н.Учрал "Зүүн бүсийн 1800 гаруй иргэнтэй уулзаж, хууль тогтоомжийн хэрэгжилт, орон нутагт тулгамдаж буй асуудлаар нээлттэй ярилцсан билээ.
Иргэдээс дэвшүүлсэн асуудлуудыг багцлан, Засгийн газрын ээлжит хуралдаанаар хэлэлцүүлсний үр дүнд дараах арга хэмжээ хэрэгжүүлэхийг салбарын сайдуудад даалгажээ.
- Төрийн албаны цалин, хөлсийг салбаруудад ялгавартайгаар тогтоож, нэмэгдүүлж байгаа асуудалд хяналт тавьж, үр дүн, гүйцэтгэлд суурилсан цалингийн сүлжээг тогтоох талаар судалж танилцуулах,
- Сүхбаатар аймгийн Ус, цаг уур, орчны шинжилгээний төв, МСҮТ-ийн барилгын их засварын зардлыг улс, орон нутгийн төсөвт үе шаттайгаар тусгаж, шийдвэрлэх,
- Бичигтийн боомтын өргөтгөлийн бүтээн байгуулалтын ажлыг эрчимжүүлэх,
- Эм, эмнэлгийн хэрэгслийн тухай, Нийгмийн эрүүл мэндийн тусламж, үйлчилгээний тухай хуулиудын хэрэгжилтийг хангаж, холбогдох журмуудыг яаралтай батлах, хэрэгжүүлэх
- Хэнтий аймгийн Батширээт суманд гал унтраах анги байгуулах ажлыг судалж, танилцуулах,
- Төлбөрт таавар, бооцоот тоглоом, цахим мөрийтэй тоглоомын үйл ажиллагаа эрхлэхийг хориглосон хууль, тогтоомжийн биелэлтэд хяналт тавьж ажиллах талаар холбогдох албан тушаалтан, харьяа салбарын сайдуудад чиглэл өглөө.
Асуудлыг цаг алдалгүй шийдвэрлэхээр ажиллаж байгаа Монгол улсын Ерөнхий сайд Г.Занданшатар, Засгийн газрын гишүүдэд талархал илэрхийлье."гэсэн байна.
Сэтгэгдэл (1)