ӨР, ОРЛОГЫН ХАРЬЦАА ХАРГАЛЗАХГҮЙГЭЭР ЛИЗИНГЭЭР БАРАА ОЛГОНО ГЭХ СУРТАЛЧИЛГАА ХИЙХГҮЙ БАЙХЫГ АНХААРУУЛАВ

Санхүүгийн зохицуулах хорооноос Санхүүгийн түрээс буюу лизингийн үйлчилгээ үзүүлэгчдэд зориулан мэдэгдэл гаргажээ. 

Мэдэгдэлд "САНХҮҮГИЙН ТҮРЭЭС /ЛИЗИНГ/-ИЙН ҮЙЛЧИЛГЭЭ ҮЗҮҮЛЭГЧДЭД МЭДЭГДЭХ НЬ

Иргэдийн бодит орлогыг хамгаалах, хэрэглээний зээлийн хэт өсөлт, өрийн дарамт, цахим зээлийн давхардлаас урьдчилан сэргийлэх зорилгоор Улсын Их Хурлаас мөнгөний болон макро зохистой бодлогын арга хэмжээг шуурхай авч хэрэгжүүлэхийг холбогдох байгууллагуудад үүрэг болгосон.

Дээрх арга хэмжээний хүрээнд Монголбанк шинээр олгох болон нөхцөлийг нь өөрчлөх хэрэглээний зээлийн өр, орлогын харьцааг 45 хувиас хэтрүүлэхгүй байхаар шийдвэрлэсэн. Харин Санхүүгийн зохицуулах хороо банк бус санхүүгийн байгууллагын олгох хэрэглээний зээлийн өр, орлогын харьцааг 55 хувиас хэтрүүлэхгүй байхаар тогтоосон. Мөн зээлдэгчийн зээлийн мэдээллийг бодит цагийн горимоор Зээлийн мэдээллийн санд нийлүүлэх чиглэлд хоёр байгууллага хамтран ажиллаж, зохих арга хэмжээг шуурхай авч хэрэгжүүлж байна.

Санхүүгийн зах зээлд үйл ажиллагаа явуулж буй санхүүгийн түрээс (лизинг)-ийн үйлчилгээ үзүүлэгчид нь тусгай зөвшөөрөл, зохицуулалтад шууд хамааралгүй ажилладаг боловч Монголбанкны Зээлийн мэдээллийн санд мэдээллийг тогтмол нийлүүлэх үүрэгтэй. Түүнчлэн бараа, бүтээгдэхүүнийг олгохдоо хэрэглэгчийн төлбөрийн чадварыг бодитоор үнэлэх нь иргэдийг өрийн дарамтад орохоос сэргийлэхэд чухал ач холбогдолтой юм.

Гэтэл энэ төрлийн зарим үйлчилгээ үзүүлэгч нь олон нийтийн мэдээллийн хэрэгслээр “орлого нотлохгүй”, “өр, орлогын харьцаа харгалзахгүйгээр лизингээр бараа олгоно” гэх мэт агуулгатай зар сурталчилгаа явуулж байна. Иргэдийн төлбөрийн чадварыг харгалзахгүйгээр ийм үйлчилгээ үзүүлэх нь өрийн дарамт үүсгэх, санхүүгийн болон сэтгэл зүйн хүндрэлд оруулах, улмаар өрхийн орлого, худалдан авах чадварт сөргөөр нөлөөлөх эрсдэлтэй.

Иймд санхүүгийн түрээсийн үйлчилгээ үзүүлэгч та бүхэн хэрэглэгчийн эрх ашгийг нэн тэргүүнд тавьж, олон нийтийг төөрөгдүүлэхүйц зар сурталчилгаа явуулахгүй байх, бараа, бүтээгдэхүүнээ худалдан борлуулахдаа худалдан авагчийн төлбөрийн чадварыг бодитой үнэлж шийдвэр гаргах, Зээлийн мэдээллийн санд холбогдох мэдээллийг тухай бүр шуурхай, үнэн зөвөөр нийлүүлж ажиллахыг үүгээр мэдэгдэж байна.

Хэрэв энэхүү мэдэгдлийн хэрэгжилтийг хангаагүй, хууль тогтоомж зөрчсөн, эсхүл хэрэглэгчийн эрх, хууль ёсны ашиг сонирхлыг зөрчсөн нь тогтоогдсон тохиолдолд хуульд заасан хариуцлага хүлээлгэхийг анхааруулж байна.

Жич: Хэрэв санхүүгийн түрээсийн үйлчилгээ үзүүлэгчийн үйл ажиллагаа хэрэглэгчийн эрх, хууль ёсны ашиг сонирхлыг зөрчсөн гэж үзвэл Санхүүгийн зохицуулах хорооны 51-261275 дугаарын утсаар мэдэгдэх боломжтой." гэсэн байна.