Монгол Улсын Ерөнхий аудитор С.Магнайсүрэн тэргүүтэй төлөөлөгчид 2026 оны 02 дугаар сарын 5–наас 8-ны өдрүүдэд Бүгд Найрамдах Турк Улсад ажиллалаа.
Энэ хүрээнд Монгол Улсын Ерөнхий аудитор С.Магнайсүрэн БНТУ-ын Тооцооны шүүхийн Ерөнхийлөгч ноён Метин Йенертэй уулзаж, хоёр орны аудитын дээд байгууллага хоорондын хамтын ажиллагааг өргөжүүлэх асуудлаар санал солилцов.
Уулзалтын үр дүнд Монгол Улсын Үндэсний аудитын газар болон БНТУ-ын Тооцооны шүүх хоорондын Хамтран ажиллах тухай харилцан ойлголцлын санамж бичгийг шинэчлэн байгуулсан байна. Санамж бичгийн хүрээнд хоёр улсын аудитын дээд байгууллагуудын албан хаагчдын мэргэжлийн чадавхыг бэхжүүлэх, сайн туршлага солилцох, хамтарсан сургалт зохион байгуулах зэрэг цаашдын хамтын ажиллагаа тогтвортой хөгжих нөхцөл бүрдлээ.
Энэхүү арга хэмжээний үеэр Монгол Улсын Ерөнхий аудитор БНТУ-ын Хамтын ажиллагаа, Зохицуулах агентлаг (ТИКА)-ийн Ерөнхийлөгч ноён Абдулла Эрендтэй уулзаж, хамтран хэрэгжүүлэх боломжтой төсөл, хөтөлбөрүүдийн талаар санал солилцжээ.. Уулзалтаар Монгол Улсын Төрийн аудитын байгууллагын чадавхыг бэхжүүлэх зорилгоор дижитал аудитын платформ хөгжүүлэх, албан хаагчдыг сургах, чадавхжуулах төслүүдэд ТИКА-гийн дэмжлэг авах саналаа илэрхийлэв. Улмаар эдгээр төсөл, хөтөлбөр нь төрийн аудитын үйл ажиллагааны үр нөлөөг нэмэгдүүлэх, хүний нөөцийн чадавхыг бэхжүүлэхэд чухал ач холбогдолтой гэдэгт талууд санал нэгдсэн байна.
Монгол Улсын Ерөнхий аудиторын энэхүү арга хэмжээ нь Монгол Улсын Үндэсний аудитын газар, БНТУ-ын Тооцооны шүүх болон ТИКА хоорондын хамтын ажиллагааг шинэ шатанд гаргаж, цаашдын үр дүнтэй, урт хугацааны хамтын ажиллагааны бат бөх суурийг тавилаа.
Сэтгэгдэл (0)
Сэтгэгдэл бичигдээгүй байна