Аж үйлдвэр эрдэс баялгийн сайдын зөвлөлийн анхдугаар хуралдаан өчигдөр /2026.02.02/ болж, тус яам, харьяа агентлагууд болон холбогдох газрын төлөөллүүд оролцож уул уурхайн салбарт тулгамдаж буй асуудал, түүнийг шийдвэрлэх хууль эрхзүйн орчныг сайжруулах хуулийн төслүүд дээр санал дүгнэлтээ хэлэлцжээ.
Cайд Г.Дамдинням "Манай салбар 2026 онд эрхзүйн шинэчлэлийн жил зарлаж байгаа. Энэ хүрээнд дөрвөн багц том хуулийг оруулж байна” гэж онцолсон аж.
Тухайлбал,
• Ашигт малтмалын тухай хуулийн нэмэлт өөрчлөлт
• Гарын тосны тухай хууль
• Газрын тосны бүтээгдэхүүний тухай хууль
• Хүнд үйлдвэрийн тухай хуульд нэмэлт өөрчлөлт оруулахаар тусгажээ.
Эдгээр дөрвөн хууль нь Аж үйлдвэр эрдэс баялгийн салбарын барих гол үндсэн хууль болохыг тодотгосон байна. Хуулийн төслүүдэд оруулж буй нэмэлт өөрчлөлттэй уялдуулан салбарт тулгамдаж буй асуудлаар Уул уурхайн бодлогын газар болон Геологийн бодлогын газрын танилцуулгыг сонсжээ. Ялангуяа стратегийн гол бүтээгдэхүүн болох алт, зэсийн үнэ дэлхийн зах зээлд өсөж буй энэ цаг үед бид 14 мега төсөлд тусгасан Зэс хайлуулах үйлдвэрийг хөдөлгөх, “Алт-3” аяны талаар хэлэлцсэн байна. Г.Дамдинням сайд Алтны үнэ түүхэн дээд амжилтад хүрсэн ч бид алтан дээр суусан гуйлгачин хэвээр байна. Алтаа яаж хөдөлгөх вэ, “Эрдэнэс Монгол” нэгдлийн харьяанд байгаа алтны төслүүдийг хэрхэн яаж ашиглах талаар шийдэл гаргая. Энэ Лхагва гаригт Засгийн газрын хуралдаанаар тогтоол оруулж хамтарсан үүрэг авна. Бодлогын чиглэлийг Аж үйлдвэрийн сайдын ахалсан хэсэг гаргана” гэжээ.
Мөн ОХУ-ын Эрхүү муж орчим хилийн зурваст шатахуун нөөцлөх савтай болох талаар Аж үйлдвэр эрдэс баялгийн яамны Газрын тосны бодлогын хэрэгжилтийг зохицуулах газрын дарга Ч.Хишигдалай болон “Эрдэнэс Монгол” ХХК-ийн гүйцэтгэх захирлын үүрэг гүйцэтгэгч Б.Даваадалай нарт үүрэг болгосон байна.
Аж үйлдвэр эрдэс баялгийн сайдын зөвлөлийн хуралдааныг 14 хоног тутам зохион байгуулж, ажлын явц, гүйцэтгэлийн талаарх мэдээллийг сонсож санал дүгнэлтээ нэгтгэх аж.
Сэтгэгдэл (0)
Сэтгэгдэл бичигдээгүй байна