Хууль зүй, дотоод хэргийн сайд Б.Энхбаяр World Justice Project (Дэлхийн шударга байдлын төсөл) байгууллагын Ази, Номхон далайн бүс нутаг хариуцсан захирал Срирак Плипатыг өнөөдөр /2026.02.02/ хүлээн авч уулзжээ.
Уулзалтын эхэнд Б.Энхбаяр сайд салбартаа авлигын эсрэг, шударга ёсыг бэхжүүлэх, иргэдийн Үндсэн хуульд заасан эрх, эрх чөлөөг хангуулахад чиглэсэн хууль, эрх зүйн шинэчлэлийг үе шаттай хэрэгжүүлж байгааг тодотгосон байна.
Мөн УИХ-ын хаврын чуулганаар Гэрч, хохирогчийг хамгаалах тухай хуулийн шинэчилсэн найруулга, Шүгэл үлээгчийг хамгаалах тухай хуулийн төсөл болон иргэдэд хүндрэл чирэгдэл учруулдаг журмуудыг боловсронгуй болгоход анхаарч буйгаа хэлжээ. Тус байгууллагатай авлигын эсрэг, шударга ёсыг бэхжүүлэх чиглэлд манлайлал үзүүлж, бодит үр дүн гарган нягт хамтран ажиллахаа Хууль зүй, дотоод хэргийн сайд Б.Энхбаяр илэрхийлсэн байна.
Ази, Номхон далайн бүс нутаг хариуцсан захирал Срирак Плипат авлигыг бууруулах, хүний эрхийг хангах, шударга ёсыг бэхжүүлэх чиглэлд манлайлал, дэмжлэг үзүүлэн ажиллаж буйд Б.Энхбаяр сайдад талархал илэрхийлэн, World Justice Project байгууллага нь баримт дүн шинжилгээнд тулгуурлан тухайн улс орны асуудлыг тодорхойлж, оновчтой шийдлийг санал болгодог гэдгийг онцолжээ.
Энэхүү байгууллага нь 20 дахь жилдээ дэлхийн улс орнуудын хуулийн засаглалыг сайжруулах чиглэлд сургалт, судалгаа, үнэлгээний олон талт үйл ажиллагаа явуулж буй олон улсын төрийн бус байгууллага юм.
Сэтгэгдэл (0)
Сэтгэгдэл бичигдээгүй байна