Санхүүгийн зохицуулах хорооны дэргэдэх Мэргэшлийн зөвлөлийн ээлжит хурлаар 2025 оны үйл ажиллагааны тайланг хэлэлцэн дүгнэж, өөрийгөө зохицуулах байгууллага болох Монголын үнэт цаасны арилжаа эрхлэгчдийн холбоо /МҮЦАЭХ/-ноос энэ онд зохион байгуулах үнэт цаасны зах зээлд ажиллах салбарын мэргэжилтнүүдэд зориулсан сургалтын хөтөлбөр, шалгалтын товыг баталжээ.
Мэргэшлийн зөвлөлийн хурлын шийдвэрээр үнэт цаасны зах зээлд ажил, үйлчилгээ явуулах мэргэжилтнүүдэд эрх олгох сургалтыг энэ оны 5 болон 11 дүгээр сард зохион байгуулахаар, харин мэргэшлийн шалгалтыг 3, 5, 9, 11 дүгээр сард нийт дөрвөн удаа явуулахаар тогтсон байна.
Энэ удаагийн МҮЦАЭХ-ноос зохион байгуулах сургалт нь Санхүүгийн мэргэшсэн шинжээчдийн нийгэмлэг (CFA institutue)-ийн сургалтын агуулга, хөтөлбөртэй нийцсэнээрээ илүү онцлогтой бөгөөд үнэт цаасны салбарын мэргэжилтнүүд онолын болон практик хосолсон мэдлэг, ур чадварыг эзэмших давуу тал бүрдэж байгаа юм. Өнөөдрийн байдлаар нийт 1080 иргэн үнэт цаасны зах зээлд мэргэжлийн ажил үйлчилгээ явуулах хүчинтэй эрхтэй байна.
Мөн энэ оноос эхлэн мэргэжилтнүүд сургалтад заавал танхимаар хамрагдалгүйгээр олон улсын стандартад нийцүүлэн боловсруулсан сургалтын цахим модуль гарын авлагын хүрээнд бие даан судалж, шалгалт өгөх боломжтой болсон нь олон улсын түвшинд нийцсэн сургалтын сайн жишиг тогтож эхлэх юм.
Үнэт цаасны салбарт ажиллахаар сонирхож буй иргэд та бүхэн эрх олгох сургалт, шалгалтын талаарх дэлгэрэнгүй мэдээ мэдээлэлтэй Монголын үнэт цаасны арилжаа эрхлэгчдийн холбооны албан ёсны цахим хуудас /www.masd.mn/-аар дамжуулан бүрэн танилцах боломжтой.
Сэтгэгдэл (0)
Сэтгэгдэл бичигдээгүй байна