Аж үйлдвэр, эрдэс баялгийн яамнаас шатахууны асуудлаар сүүлийн хоёр өдөр дараалан мэдээлэл хийлээ. Өнөөдөр /2025.12.24/ мэдээлэл хийх үеэр дэд сайд Б.Энхтүвшин “Өдөрт 60 вагон орж ирвэл нөөц үүсгэж шатахуун түгээх станц руу явуулах боломжтой” гэсэн юм. Түүний өгсөн мэдээллээр манай улсад өдөрт 34 вагон АИ-92 автобензин орж ирвэл өдрийн хэрэгцээ хангагддаг байна. Харин арванхоёрдугаар сар гарсаар 13 өдөр нь 34-өөс доош вагон орж иржээ. Өөрөөр хэлбэл, бид нөөцөө бүрдүүлж амжихгүйгээр хилээр орж ирж буй вагоныг шууд түгээлтэд гаргаж байгаа учир шатахууны доголдол үүссэн байна. Тиймээс гадуур шатахуун түгээх станцуудад оочир дараалал үүссэн гэх тайлбарыг тэрбээр өгсөн юм.
Тус яамны Газрын тос бодлогын хэрэгжилтийг зохицуулах газрын дарга Ч. Хишигдалай ойрын өдрүүдээс шатахууны нийлүүлэлт хэвийн болно гэв. Сүүлийн зургаан хоног ОХУ-аас нийлүүлэгдэж буй АИ-92 автобензин болон бусад төрлийн шатахуун эрс нэмэгджээ. Тухайлбал, арванхоёрдугаар сарын 19-нд Сүхбаатар боомтоор 47 вагон орж ирсэн бол арванхоёрдугаар сарын 21-нд 63 вагон орж ирсэн байна. Арванхоёрдугаар сарын 22-нд 65 вагон орж ирсэн бөгөөд нийт 265 мянган АИ-92 автобензин буюу 16 мянган тонн бүтээгдэхүүн нийлүүлэгджээ.
Ч.Хишигдалай “Арванхоёрдугаар сарын эхэнд өдрийн хэрэглээг хангахгүй хэмжээний бүтээгдэхүүн орж ирсэн учраас доголдол үүссэн. Өнөөдрөөс /2025.12.24/ эхлэн хэрэгцээнээс давсан илүү бүтээгдэхүүн орж ирж байгаа учир хангамж сайжирч байна. Монгол Улсын өдрийн хэрэглээ 2200-2400 тонн байдаг. Энэ хэрэглээг давсан бүтээгдэхүүн сүүлийн үед нийлүүлэгдэж байна гэсэн үг. Өнөөдөр үүсээд буй оочир дараалал тун удахгүй арилна. Бид өнгөрсөн шөнө шатахууны нөхцөл байдалд хяналт тавьж ажилласан. Оочир дараалал буурсан байна билээ. Тиймээс иргэдийг хүлээцтэй байхыг хүсье ” гэлээ.
Салбарын яамнаас шатахууны гол нийлүүлэгч ОХУ-ын Роснефть компанийн Ангарскийн нефт боловсруулах үйлдвэрээс ачилтын мэдээллийг өдөр бүр авдаг бөгөөд 4-7 хоногийн хугацаанд манай улс руу бүтээгдэхүүн нийлүүлдэг байна. Тухайлбал,
- 2025.12.18 – 53 вагон
- 2025.12.19 – 43 вагон
- 2025.12.20 - 60 вагон АИ-92 автобензин, сүүлийн таван өдөрт нийт дүнгээр 16 мянган тонныг нийлүүлжээ.
Өчигдрийн /2025.12.23/ ачилтын мэдээлэл ОХУ-ын цагаар үдээс хойш салбарын яаманд ирэх аж.
Сэтгэгдэл (0)
Сэтгэгдэл бичигдээгүй байна