Байгаль орчин, уур амьсгалын өөрчлөлтийн сайд Б.Батбаатар Кени улсын Найроби хотноо зохион байгуулагдаж буй Байгаль орчны тухай НҮБ-ын Ассемблейн 7 дугаар чуулганд оролцох үеэрээ Япон Улсын Байгаль орчны дэд сайд Кентаро Доитой уулзаж, хоёр улсын байгаль орчны салбарын хамтын ажиллагааг чиглэлээр санал солилцжээ.
Уулзалтын эхэнд Дэд сайд Кентаро Дои хоёр улсын байгаль орчны салбарын хамтын ажиллагаа өргөжиж байгаад талархахын зэрэгцээ цөлжилт, шар шороон шуурганы чиглэлээр идэвхтэй ажиллахад бэлэн байгаагаа онцолсон байна.
Б.Батбаатар сайдын зүгээс хамтын ажиллагаанд шинээр нэмэгдэж буй говийн заг модыг нутагшуулах ажлыг давхар үр ашигтайг үнэлээд төсөл хэрэгжиж буй орон зайг тэлэхийг хүссэн юм. Улмаар даян дэлхийн байгаль орчны гурвалсан хямралыг уялдаатай хэрэгжилтээр хангахыг эрмэлзэж буйгаа илэрхийлсэн байна. Үргэлжлүүлэн, үндэсний хэмжээнд байгаль орчны хүний нөөцийг бэхжүүлэх, дахин сургах, чадавхжуулах хамтын хөтөлбөр хэрэгжүүлэх талаар санаачлага гаргасанаа дурдаад Японы талыг дэмжин ажиллахыг хүсжээ.
Дэд сайд Кентаро Доигийн зүгээс байгаль орчны салбарын хүний нөөцийг бэхжүүлэх, дахин сургах чиглэлд дэмжлэг үзүүлэх, Цөлжилттэй тэмцэх тухай НҮБ-ын конвенцын Талуудын бага хурлыг зохион байгуулахад өөрийн нөөц боломжийн хүрээнд хамтран ажиллахад бэлэн гэдгээ илэрхийлсэн байна.
Б.Батбаатар сайд мөн БНСУ-ын Уур амьсгалын өөрчлөлт, эрчим хүч, байгаль орчны дэд сайд Ким Хан Сёнгтай уулзаж, уур амьсгалын өөрчлөлт, ногоон санхүүжилт, эрсдэлийн менежмент, цаг уурын тандалт ба мониторинг зэрэг салбарт хамтын ажиллагаагаа өргөжүүлэхээр санал нэгджээ.
Цаашид бүс нутагт давтамж ихсэж буй шар шороон шуурганы асуудлыг илүү системтэйгээр хамтран шийдвэрлэхэд хамтран ажиллахаар санал солилцсон байна.
Байгаль орчин, уур амьсгалын өөрчлөлтийн сайд Б.Батбаатар хоёр яамны хамтын ажиллагаа сэргээгдэх эрчим хүчээр нэмэгдэх боломжтой болж байгаад олзуурхаж байгаагаа илэрхийлээд 2023 онд Засгийн газар хооронд байгуулсан Уур амьсгалын асуудлаарх хэлэлцээрийн хэрэгжилтийг эрчимжүүлэх дотоодын бэлтгэлээ хангаж буй тул ойрын хугацаанд тодорхой ажлуудыг эхлүүлэхийг санал болгожээ.
Монголын талаас салбарын хүний нөөцийн асуудлыг анхаарч ажиллахаар санаачлага гаргаад байгаа тухай мэдээлэл болон дэмжин ажиллахыг хүссэн хүсэлтийн дагуу Солонгосын тал хөгжиж буй орнуудад чиглэсэн төсөл, сургалтын хөтөлбөрийн хүрээнд Монголын байгаль орчны салбарын мэргэжилтнүүдийг чадавхжуулах, сургалт, солилцоог нэмэгдүүлэхээ мэдэгдсэн байна.
Сэтгэгдэл (0)
Сэтгэгдэл бичигдээгүй байна