Монгол Улсын Засгийн газрын мөрийн хөтөлбөр, “Алсын хараа 2050” Монгол Улсын урт хугацааны хөгжлийн бодлогын хүрээнд нийслэлийн Хан-Уул дүүргийн нутаг дэвсгэрт хэрэгжүүлж буй “Солонго-1”, “Солонго-2” орлогод нийцсэн орон сууцны хороолол барих төслийн үйл явцтай Хот байгуулалт, барилга, орон сууцжуулалтын сайд Э.Бат-Амгалан газар дээр нь очиж танилцлаа.
Төслийн захиалагчаар Хот байгуулалт, барилга, орон сууцжуулалтын яам, захиалагчийн хяналтыг “Төрийн орон сууцны корпораци” ТӨХХК, зөвлөх үйлчилгээг БНСУ-ын “Мүүён Си Эм” төлөөний газар, Ерөнхий гүйцэтгэгчээр “Колон Глобал корпораци”, туслан гүйцэтгэгчээр “Гранд Слаб Инвест” ХХК тус, тус ажиллаж байгаа юм.
Дашрамд дурдахад, БНСУ-ын Засгийн газрын Эдийн засгийн хөгжлийн хамтын ажиллагааны сангийн хөнгөлөлттэй зээлийн хөрөнгөөр санхүүжүүлэн баригдаж буй уг төсөл нь нийслэлийн Хан-Уул дүүргийн 21 дүгээр хорооны нутаг дэвсгэрт хэрэгжиж байна. Тус төсөл нь нийт 17.19 га талбайд босох бөгөөд 5,002 айлын орон сууцны хорооллыг 41 сарын хугацаанд бүрэн барьж дуусган ашиглалтад өгнө.
Түүнчлэн төслийн эхний ээлжийн барилгууд 2025 оны 12 дугаар сард ашиглалтад орсны дараа Засгийн газрын тогтоол гарч, шинээр батлагдах журмын дагуу бүртгэл явагдана. Одоогоор Засгийн газрын тогтоол гараагүй байгаа тул ямар нэгэн бүртгэл явагдаагүй болохыг албан ёсоор мэдэгдье.
Мөн бүртгэлийн талаарх мэдээллийг “Төрийн орон сууцны корпораци” ТӨХХК-ийн пэйж хуудас болон www.tosk.gov.mn вэб сайтаар хүргэнэ. Иргэдэд сануулахад байгууллагын болон албан хаагчдын нэрийг барьж, залилангийн гэмт хэрэг үйлдэгсэд их байгаа тул гэмт этгээдүүдэд мөнгө өгч хохирохоос болгоомжлоорой.
Албан ёсны мэдээллийг “Төрийн орон сууцны корпораци” ТӨХХК-ийн пэйж хуудас болон сайт, 7288-7788 дугаарт залгаж авахыг сануулж байна.
Сэтгэгдэл (0)
Сэтгэгдэл бичигдээгүй байна