Хот байгуулалт, барилга, орон сууцжуулалтын яамны Төрийн нарийн бичгийн дарга М.Баяраа Бүгд Найрамдах Солонгос Улсын Газар, дэд бүтэц, тээврийн яамны урилгаар тус улсад ажиллаж байна.
Айлчлалын эхний өдөр /2025 оны 9 дүгээр сарын 24-ний өдөр/ ХББОСЯ-ны Төрийн нарийн бичгийн дарга М.Баяраа БНСУ-ын Газар, дэд бүтэц, тээврийн яамны дэд сайд Ли Санг Кёнгтэй уулзаж, хоёр улсын хот байгуулалт, орон сууцжуулалт, орон зайн дэд бүтцийн өгөгдлийг сайжруулах чиглэлээр хамтран ажиллах санамж бичигт гарын үсэг зурлаа.
Үргэлжлүүлэн тэрбээр БНСУ-ын Орон сууц, хот байгуулалтын баталгааны корпорацын ТУЗ-ын төлөөлөлтэй уулзаж, Монгол Улсад орон сууцны нийлүүлэлтийг нэмэгдүүлэх чиглэлээр хамтран ажиллахаар санал солилцов.
Тус корпораци нь БНСУ-д орлогод нийцсэн орон сууцны нийлүүлэлтийг нэмэгдүүлэх, хот дахин төлөвлөн шинэчлэх, зорилтот бүлгийн орон сууцны хөтөлбөр хэрэгжүүлэх зэрэг чиг үүргийг гүйцэтгэдэг бөгөөд томоохон төслүүдэд санхүүжилт татах батлан даалт гаргах, иргэдийг урьдчилгаа төлбөрийн хэмжээнээс хамааран орон сууцанд тэргүүн ээлжинд хамруулах зэрэг арга хэмжээг хэрэгжүүлдэг байна.
Энэхүү уулзалтаар Монгол Улсын орон сууцжуулалтын хууль эрх зүйн орчныг сайжруулах, холбогдох дүрэм, журамд өөрчлөлт оруулах талаар зөвлөгөө өгөхөөс гадна иргэд, аж ахуйн нэгжүүдийн чадавх сайжруулах сургалт, семинар зохион байгуулах, хуулийн хэрэгжилтийг тогтвортой хангуулахад хамтран ажиллахаар тохирлоо.
Сэтгэгдэл (0)
Сэтгэгдэл бичигдээгүй байна