Зэвсэгт хүчний нэгтгэл, ангиудад 2025 оны хоёрдугаар ээлжээр хугацаат цэргийн албанд татагдсан шинэ дайчдын Цэргийн тангараг өргөх ёслол өнөөдөр /2025.11.29/улс орон даяар боллоо.
Зэвсэгт хүчний 341 дүгээр ангийн хугацаат цэргийн алба хаагчдын тангараг өргөх ёслолын ажиллагаанд Зэвсэгт хүчний Жанжин штабын дарга, дэслэгч генерал С.Ганбямба нарын удирдлагууд болон шинэ дайчдын ар гэрийн төлөөлөл оролцсон юм.
Ёслолын үеэр Зэвсэгт хүчний Жанжин штабын дарга, дэслэгч генерал С.Ганбямба Цэргийн тангараг өргөсөн дайчид Монгол Улсын Зэвсэгт хүчинд алба хааснаар барилгын засал чимэглэлчин, хүнд машин механизмын оператор зэрэг мэргэжлээр богино хугацаанд бэлтгэгдэж, “Мэргэжлийн үнэмлэх”, “Чадамжийн гэрчилгээ” авч, онолоор сурсан мэдлэгээ эх орныхоо бүтээн байгуулалтад дадлагаар бататган ур чадвараа нэмэгдүүлэх, монгол бичиг, англи хэл, мэдээлэл технологийн анхан шатны сургалтанд хамрагдах боломжтойг онцлон тэмдэглэж, дайчдадаа дахин чин сэтгэлийн халуун баяр хүргэж, амжилт хүсэв.
Энэ өдрийн үйл ажиллагааг ангийн нээлттэй хаалганы өдөрлөг хэлбэрээр зохион байгуулж, саяхан нээлтээ хийж ашиглалтад орсон цэргийн байр, сургалтын орчинтой ар гэрийн төлөөллийг танилцуулж, зэвсэглэл, бүтээн байгуулалтын техник, хэрэгслийн үзэсгэлэн дэлгэж үзүүлсэн байна.
Мөн энэ үеэр цэргийн анхан шатны бэлтгэл сургалтад бусдыгаа манлайлсан зарим дайчдыг "Онц буудагч" тэмдгээр шагнаж, дайчдын ар гэрт удирдах газрын даргын талархлын захидлыг гардуулжээ.
Сэтгэгдэл (0)
Сэтгэгдэл бичигдээгүй байна