Дэлхий нийтээрээ нэгдэж Абу Дабид хуралдсан Байгаль хамгааллын чуулганд Байгаль орчин, уур амьсгалын өөрчлөлтийн сайд Б.Батбаатар оролцлоо.
Тэрбээр “Газрын доройтлын нэгдсэн менежментээр хуурай бүс, гангийн тэсвэрлэх чадамжийг нэмэгдүүлэх нь” сэдэвт өндөр түвшний хэлэлцүүлэгт оролцож хуурай бүс нутгийн уур амьсгалын өөрчлөлт, газрын доройтлыг бууруулах бодлого, бэлчээрийн менежментийн шинэ хандлагын талаар үг хэлсэн юм.
“Монгол улс төдийгүй олон улсын хэмжээнд бэлчээрийн менежментийн хувьд 2026 он цөөхөн тохиох алтан боломж юм. Хоёр сарын дараа “Бэлчээр ба нүүдлийн мал аж ахуйн олон улсын жил” албан ёсоор эхлэх гэж байна. Монгол Улс НҮБ-ын Цөлжилттэй тэмцэх конвенцын Нарийн бичгийн дарга нарын газартай хамтран ‘Бэлчээрийн тэргүүлэх санаачилга’-ыг “UNCCD COP17” хурлын үеэр албан ёсоор зарлах бэлтгэлээ хангаж байна” гэж Б.Батбаатар сайд хэлсэн үгэндээ тэмдэглэжээ.
Мөн бэлчээрийн экосистемийн доройтлыг бууруулах, нүүдлийн мал аж ахуйн уламжлалт мэдлэгт суурилсан уур амьсгалын дасан зохицох шийдлүүдийг дэлхийн хэмжээнд түгээх нь Монгол Улсын тэргүүлэх чиглэл болохыг онцолсон байна.
Хэлэлцүүлэгт Даян дэлхийн байгаль орчны сангийн (GEF) төлөөлөл, Олон улсын байгаль хамгаалах холбоо (IUCN)-ны Ерөнхий захирал Гретел Агуйлар, Цөлжилттэй тэмцэх тухай НҮБ-ын конвенцын орлогч нарийн бичгийн дарга Андреа Мурилло, Кени Улсын Байгаль орчны сайд Др. Дебора Мулонго Бараса, Францын Даян дэлхийн байгаль орчны сангийн Ерөнхий нарийн бичгийн дарга Стефани Бузигэс Эшман, Саудын Арабын Хаант Улсын Үндэсний ойжуулалтын хөтөлбөрийн дэд ерөнхийлөгч Ахмад Аль Анази нар оролцож санал солилцжээ.
Энэхүү хэлэлцүүлэг нь 2026 онд манай улсад зохион байгуулагдах UNCCD-ийн Талуудын 17 дугаар бага хурал (COP17)-ын бэлтгэл ажлын нэгэн чухал үе шат бөгөөд Монгол Улс дэлхийн хуурай бүс нутгийн орнуудын хамтын манлайллыг бэхжүүлэх чиглэлээр бодит хувь нэмэр оруулж буйг илтгэв.
Сэтгэгдэл (0)
Сэтгэгдэл бичигдээгүй байна