ЗАСГИЙН ГАЗРЫН АГЕНТЛАГИЙН АЛБА ХААГЧДЫН ОРОН ТООГ ЕСӨН ХУВИАР БУЮУ 301-ЭЭР БУУРУУЛЛАА

Засгийн газрын өнөөдрийн /2025.08.20/ хуралдаанаар агентлагуудын бүтэц, орон тоог цомхон чадварлаг болгох асуудлыг хэлэлцэж шийдвэрлэжээ. 

35 агентлагийн орон тооны хязгаар 3353 байсныг есөн хувиар бууруулж, 3052 болгосон байна.  Агентлагууд доторх газар хэлтэс, тасаг, албадын тоог цөөлж, чиг үүргийн давхардлыг арилгах замаар нийт орон тоог 301-ээр багасгаж, газар, хэлтэс албадын даргын тоог 54-өөр бууруулжээ. Ингэснээр цалин хөлсний зардал дээр 10 орчим тэрбум төгрөгийн хэмнэлт бий болно. 

Яам, агентлагуудын газар хэлтсийн дарга нарыг цомхотгосноор 20 орчим тэрбум төгрөг, Үндэсний хороо, зөвлөлийг татан буулгаснаар 40 орчим тэрбум төгрөг, нийт 60 гаруй тэрбум төгрөг хэмнэж, эрүүл мэнд, боловсролын салбарт зарцуулна.  

Агентлагийн бүтэц зохион байгуулалтыг батлахдаа нэг дор 9 хувиар цомхотгохгүй, тодорхой үе шаттай хэрэгжүүлнэ. Тэтгэвэрт гарч байгаа, ажлаа хийхгүй, чөлөө авсан, ажлаас халагдсан орон тоонуудыг цомхотгох, шаардлагагүй бүтэц дээр ахиухан цомхотгол хийх, шаардлагатай орон тоог авч хадгалж үлдэх боломжийг бий болгож байгаа. Агентлагууд хуульд заагаагүй бол орлогч дарга, дэд даргатай ажиллахыг хориглосон. Мөн агентлагуудын албан хаагчийн чиг үүрэг яам, харьяа газруудтай давхцахгүй байх шаардлагыг тавина гэж Засгийн газрын хэрэг эрхлэх газрын дарга С.Бямбацогт мэдэгдлээ. 

Мөн Төрийн албаны хуулийн шинэчилсэн найруулгыг намрын чуулганаар УИХ-д өргөн барина, төрийн албан хаагчдын гүйцэтгэлийн үнэлгээг ил байршуулж, иргэдээр үнэлүүлдэг болно гэв.