2026 оны улсын төсвийн төсөлд олон нийтээс санал авах үйл ажиллагаа өнөөдрөөс буюу наймдугаар сарын 1-нээс орон даяар эхэлж байна.
Саналыг цахим хэлбэрээр буюу 11-11 төв, E-Mongolia аппликейшн болон бүх яамны цахим хуудсаар дамжуулан авах юм. Түүнчлэн холбогдох хууль, журамд заасны дагуу төсвийн төслийн олон нийтийн хэлэлцүүлгийг танхимаар наймдугаар сарын 4-14-ний өдрүүдэд салбар бүрээр зохион байгуулахаар төлөвлөөд байна. Хэлэлцүүлэгт оролцогчдыг цахимаар болон биеэр бүртгэнэ.
Төсвийн төсөлд санал авах санал нийт 12 удаагийн хэлэлцүүлгийн хуваарийг танилцуулъя.
Төсвийн ерөнхийлөн захирагчид 2026 оны төсвийн саналаа Төсвийн тухай хуульд заасны дагуу долдугаар сарын 25-ны дотор санхүү, төсвийн асуудал эрхэлсэн төрийн захиргааны төв байгууллага болон холбогдох бусад байгууллагад хүргүүлсэн. Ерөнхий сайд Г.Занданшатар 2026 оны төсвийн төслийг боловсруулахад хуульд заасны дагуу олон нийтийн оролцоог хангаж ажиллахыг үүрэг болгосны дагуу ийнхүү иргэдийн оролцоотой төсөв боловсруулах үйл явц үргэлжилж байна. 2026 оны төсвийн төслийг олон нийтээр хоёр долоо хоногийн турш хэлэлцүүлж, нэгтгээд үр дүнг нь наймдугаар сарын 15-нд Сангийн яаманд хүргүүлж, төсвийн төсөлд тусгуулах юм.
Сэтгэгдэл (0)
Сэтгэгдэл бичигдээгүй байна