Байгаль орчин, уур амьсгалын өөрчлөлтийн сайд Б.Батбаатараар ахлуулсан ажлын хэсэг Өвөрхангай аймагт ажиллаж, аймгийн Байгаль орчны газрын албан хаагчидтай уулзжээ.
Тус аймгийн Байгаль орчны газар нийт 32 хүний бүрэлдэхүүнтэй ажиллаж байна. Аймгийн байгаль орчны газрын дарга Т.Эрдэнэбаяр Арвайхээр хотын ундны усны хайгуул 1987 оноос хойш хийгдээгүйг онцлоод, мөн Сант сумын ундны усны нөөц хүндрэлтэй нөхцөл байдалд хүрсэн тул энэ чиглэлд анхаарч өгөхийг сайдаас хүссэн байна. Түүнчлэн говийн бүсийн усан хангамжийг сайжруулахаар төлөвлөсөн засгийн газрын төлөвлөгөөний дагуу Орхон-Онги төслийн урсацыг зарим нутагт орших газар тариалангийн талбай дамнуулах, ойролцоо дамжин өнгөрөх сумдын нуур горхийг тэтгэх зорилгоор трассын зурагт өөрчлөлт оруулах, сүүлийн 15 жил гадаадын төсөл хөтөлбөр хэрэгжээгүй аймгийн байгаль орчны газарт гадаад болон дотоодын төсөл хөтөлбөр хэрэгжүүлэхэд дэмжлэг үзүүлэх боломжийг тодрууллаа.
Үүний дараа тус байгаль орчны газрын харъяа Онги Таац голын сав газрын захиргааны дарга С.Дуламрагчаа албан хаагчдын хяналт шалгалт, судалгаа шинжилгээний ажлын хэрэгцээнд туулах чадвартай тээврийн хэрэгсэл дутагдалтай байгааг дуулгав.
Мөн албан хаагчдын зүгээс салбарын мэргэжилтнүүдийг гадаад, дотоодын сургалтад хамрагдах, туршлага судлах асуудал сүүлийн жилүүдэд орхигдож байгааг онцолжээ.
Байгаль орчин, уур амьсгалын өөрчлөлтийн сайд Б.Батбаатар, салбарын хяналтын газрын дарга Б.Мөнхтогтох нар эдгээр тулгамдсан асуудлуудыг бодлогын түвшинд эрэмбэлэн ангилж шат дараатай арга хэмжээ авч ажиллахаа илэрхийлсэн байна.
Өвөрхангай аймгийн Байгаль орчны газар нийт долоон хөв цөөрмийн төслийг холбогдох газруудаар батлуулж ажил хэрэг болгон бусад аймгуудыг манлайлж байгааг БОУАӨ-ийн сайд Б.Батбаатар өндрөөр үнэлжээ.
Сэтгэгдэл (0)
Сэтгэгдэл бичигдээгүй байна