Алтай таван богд Сонгинотын даваанаас 2025 оны 4 дүгээр сарын 2-ны өдөр гараагаа эхлүүлсэн "Таван цэг" багийн гүйгч Зэвсэгт хүчний 123 дугаар ангийн хөгжимчин цэрэгжлийн спортын мастер ахлах ахлагч Э.Даваажамц 76 дахь өдрөө гүйж байна.
Тэрбээр энэ хугацаанд эх орныхоо баруун хязгаараас зүүн хязгаар, төв цэг, хойд цэг гэсэн маршрутаар гүйж яваа юм.
"Таван цэг"-ийн гүйгч Зэвсэгт хүчний 234 дүгээр ангийн гүүрчин аврагч спортын мастер дэд ахлагч Б.Буянхишиг 46 хоногт 2222 км туулсан амжилтаар гүйлтээ албан ёсоор зогсоосон ч өөрийн төрөлх Булган аймгийн нутаг дэвсгэр болон төв суурин газруудад хамтдаа гүйж яваа билээ.
Ахлах ахлагч Э.Даваажамцийн хувьд өнөөдөр /2025.06.16/ өдрийн байдлаар 3540 гаруй км замыг туулаад байгаа бөгөөд энэ нь нийт замынхаа 70 гаруй хувийг ардаа орхисон гэсэн үг.
Тэрбээр Хөвсгөл, Архангай, Өвөрхангай, Дундговь, Өмнөговь гэсэн 5 аймгийн 23 сумын нутаг дэвсгэрийг дайрах буюу эх орныхоо хойд цэг Монгол шарын даваанаас өмнөд захын цэг Өмнөговь аймгийн Орвог гашууны Бор толгойг зорин гүйснээр төсөл амжилттай хэрэгжиж дуусах юм. Төлөвлөгөө ёсоор 7 дугаар сарын 8-ны өдөр гэхэд эх орныхоо өмнөд цэг дээр очих юм байна.
Сэтгэгдэл (0)
Сэтгэгдэл бичигдээгүй байна