Эх орныхоо дөрвөн зүгийн хязгаарыг төвийн цэгтэй холбосон 5000 км замыг гүйж туулахаар 2025 оны 4 дүгээр сарын 2-ны өдөр гараанаас гарсан “Таван цэг” багийнхан энэ цаг үед Монгол Улсын хойд цэг буюу Монгол шарын даваа хүрэхээр явж байна.
“Таван цэг”-ийн гүйгч Зэвсэгт хүчний 123 дугаар ангийн ахлах ахлагч Э.Даваажамц Хөвсгөл аймгийн Цагааннуур сумаас Монгол шарын даваа хүртэлх зам битүү намаг, нарийн гол, ой модоор хүрээлэгдсэн учир тэр хүртэлх замыг мориор туулж, эргэхдээ төлөвлөгөөний дагуу гүйхээр төлөвлөөд байгаа аж.
Энэ дагуу 6 дугаар сарын 11-ний өдөр Зэвсэгт хүчний 3, Хилийн цэргийн 4 нийт долоон алба хаагч найман хүлэг морьтойгоор Монгол шарын давааг зорьсон юм.
Ахлах ахлагч Э.Даваажамц “Бид долуулаа, найман морьтойгоор эх орныхоо хойд цэг Монгол шарын давааг зорих хүндтэй ажлаа яг одоо эхлүүлж байна. Эх орныхоо тусгаар тогтнолын илэрхийлэл болсон хязгаар цэгүүдэд хүрэх ажилд маань Хилийн цэргийн алба хаагчид дэмжлэг үзүүлж байгаад үнэхээр их талархаж байна. Хилийн цэргийн 0257 дугаар ангийн дугаар заставын орлогч офицер Н.Ихбаяр өөрийн биеэр ахлан гурван алба хаагчийнхаа хамт бидний замд газарчлахаар болсныг онцгойлон дурдах ёстой. Хурдан хүлгүүдээ ч уургалан барьж өглөө, тэд маань. Зэвсэгт хүчнээс “Таван цэг” багийн гүйгч миний бие болон тогооч, жолоочоор томилогдон ажиллаж байгаа сургагч ахлагч Батзориг (016), ахлах ахлагч Б.Золбоо (123) нар хамтдаа явж байна. Эмэгтэй гүйгч дэд ахлагч Б.Буянхишиг (234) болон эмч дэслэгч Б.Золбоо (123) хоёрыг амаргүй зам туулахтай холбоотойгоор хилийн цэргийнхээ заставт үлдээсэн. Мэдээж үүнээс цааш сүлжээгүй, таван хоногийн дараа сүлжээтэйгээ эргэж залгах байх. Монгол шарын даваа хүрээд буцахдаа миний бие гүйж ирнэ” гэсэн мэдээллийг өгсөн байна.
“Таван цэг” багийнхан гүйлтээ эхлүүлснээс хойш эх орныхоо баруун хязгаар, зүүн хязгаар, төвийн цэг, хойд бүсийг чиглэсэн гүйлтүүдийг амжилттай гүйцэтгэсэн юм.
Тэд төлөвлөгөөний дагуу хойд захын цэг Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэлх 5 аймаг, 23 сумын нутаг дэвсгэрээр дамжин гүйлтээ үргэлжлүүлнэ.
Эх сурвалж: Зэвсэгт хүчний жанжин штаб ахмад Д.Болор
Сэтгэгдэл (0)
Сэтгэгдэл бичигдээгүй байна