Эх орныхоо 4 зүгийн хязгаарт орших Соёмбот баганыг төв цэгтэй холбосон 5000 км замынхаа 2490 км замыг Зэвсэгт хүчний 123 дугаар ангийн хөгжимчин цэрэгжлийн спортын мастер ахлах ахлагч Э.Даваажамц 50 дахь өдрөө буюу өчигдөр /2025.05.20/ туулжээ. Ингэснээр нийт туулах зам, хоногийнхоо 50 хувийг тавдугаар сарын 21-ний энэ өдөр Дорнод аймгийн Хөлөнбуйр суманд хүргэсэн амжилтыг манай гүйгчид үзүүлж байгаа юм.
Түүнтэй хамтран гүйгч Зэвсэгт хүчний 234 дүгээр ангийн гүүрчин аврагч спортын мастер дэд ахлагч Б.Буянхишигийн хувьд 2222 км замыг туулсан амжилтаар гүйлтээ зогсоосон ч төв суурин газруудад мөн л хамтдаа гүйж, цэргийн алба, хэт холын марафон спортыг орон нутгийн иргэд, хүүхэд залуучуудад сурталчилж байна.
Ташрамд дурдахад "Таван цэг" багийнхны яваа Дорнод аймгийн Хөлөнбуйр сум нь 1945 онд үүсгэн байгуулагдсан бөгөөд энэ онд түүхт 80 жилийн ой нь тохиож буй аж. Тус сум нь Сүхбаатар аймгийн Сүхбаатар, Түмэнцогт, Хэнтий аймгийн Баян-Овоо, Норовлин сумд болон Дорнод аймгийн Цагаан-Овоо, Булган зэрэг сумдтай хил залган зүүн гурван аймгийн уулзварт Улаанбаатар Дорнодыг холбосон төв зам дагуу оршдогоороо онцлог байна.
Эх сурвалж: Зэвсэгт хүчний жанжин штаб
Сэтгэгдэл (0)
Сэтгэгдэл бичигдээгүй байна